Mirando cu varios miembro di parlamento cu ta forma coalicion a opta pa “rek” nan estadia na Hulanda durante henter e siman aki, a pone cu a opta pa yama gremio comercial y sindical pa un reunion mañan diabierna pa 9:00 am na Parlamento di Aruba, pero cu porta cera. A warda simannan pa haya un reunion pidi tanto pa banda di gremionan pero tambe door di oposicion, pa awo haya un encuentro cu no ta cuadra cu e intencion, esta pa pueblo ta miho informa.
Mientras e gremionan a spera un reunion publico, transmiti via radio y internet, a opta pa reuni den un “commissievergadering”, cu porta cera, sin transmicion y sin cu partidonan por papia despues di e reunion pa elabora riba contenido di e encuentro. Di e forma aki lo priva pueblo pa haya sa e berdad di kico e gremionan ta vocifera, nan preocupacionnan y nan critica riba introduccion di cobransa di impuesto (BBO) na frontera y su posibel consecuencianan. Gremio a laga sa di lo atende e reunion, pero bou protesta. Nan lo desea pa por vocifera nan opinion, pa por debati den un setting publico. Pero tampoco kier laga e oportunidad pa topa Parlamento pasa. Durante e reunion lo pidi pa haci e reunion publico of yama un otro reunion.
Presidente di e reunion Commissie Financien, Overheidsorganizatie, Cultuur en Sport (CFOCS) ta Parlamentario Setty Christiaans-Yarzagaray di partido MEP. Pero, e reto ta cu varios parlamentario di coalicion, entre otro di Raiz, a opta pa keda Hulanda henter e siman aki, siendo cu IPKO a caba di diabierna siman pasa caba. Manera ta conoci, coalicion tin un mayoria limita di 11 asiento, pues tur parlamentario mester t’ey sino no tin quorum. E pregunta ta pakico a rek estadia/vakantie na Hulanda siendo aki cu akibanda tin trabou grandi pa haci.
Siguidonan di politica ta kere cu parlamentarionan ta fix nan mes aki cu daggeldvergoeding di $450 pa cada dia cu nan ga na Hulanda. Keda 14 dia ta encera $6300, kitando e gasto limita di hotel y cuminda, ta resta hopi pa uzo personal of pa spaar. Ta sinti cu, como cu no a tende di ningun reunion mas despues di IPKO, cu aki por conclui cu tin kedamento como vakantie, cu no tin awo, of inventa supuesto reunionnan pa por cobra mas na “per diem”.
E actitud iresponsabel aki di nos parlamentarionan tin gremio comercial y sindical masha indigna. Ta sinti un falta di seriedad den atende asuntonan na cas, den regla un sistema fiscal mas husto pa tur hende y no solamente pa gobierno por yena su saconan.
