Gremionan ta keda cu nan preocupacionnan, a pesar cu a pospone introduccion di e ley di 7% di BBO na frontera.
Aruba Hotel & Tourism Association a manda un carta pa miembronan di Parlamento unda ta expresa nan preocupacionnan. Den e carta ta haci un apelacion pa no inclui den e ley di BBO na frontera “handelsgoederen” pa evita aumento di prijsnan na gran escala. A manda copia di e carta aki pa Minister di Asuntonan Economico, Comunicacion y Desaroyo Sostenibel Geoffrey Wever; Minister di Turismo y Salud Publico Dangui Oduber; Minister di Finanza y Cultura Xiomara Maduro.
E deliberacionnan ta cuminsa diaranson mainta den Parlamento riba e controversial tema di introduccion di 7% di BBO na frontera. Probechando di esaki a dicidi manda un carta pa Parlamento den cual ta pone aspectonan pa tene na consideracion.
Den e carta ta splica cu den ley awo ta papia di e 7% na frontera cu ta limita solamente na mercancianan comercial (handelsgoederen). Nan a mira cu e ley no tin un definicion cla di loke ta mercancianan comercial y tin algun ehempel limita den e Nota di Splicacion, cual nan ta kere lo crea mas discucion encuanto kico ta considera mercancianan comercial y kico no. Pero tambe ta dificil pa maneha y e control di departamento di impuesto.
E Nota di Splicacion (Memorie van Toelichting) specificamente ta exclui restaurant y hotelnan di ta eligible pa e compensacion, aunke cu den e conferencia di prensa di Gobierno dia 22 di juni ultimo, a menciona cu lo kita e restriccion pa restaurantnan. Te awo gremio no tin informacion si esaki berdaderamente a tuma luga.
Tambe a bisa Parlamento cu tur compania y tiendanan, incluso esnan cu ta bende materialnan comercial, ta importa articulonan cu no ta pa reventa. A duna ehempel di forklift pa depositonan, ekiponan di trabou, provisionnan y productonan cu ta wordo exigi den e acuerdo cera cu frankicianan, cu ta materialnan cu no ta disponibel riba e isla.
No mester lubida cu e limitacion di materialnan comercial tin un efecto directo riba e gastonan pa tur e companianan y consecuentemente riba e prijsnan na consumidor.
Pero loke ta mas preocupante pa e comerciantenan ta cu den e ultimo 10 añanan, of menos, e gastonan di haci negoshi a aumenta di forma significativo debi na medidanan tuma anteriormente. Y nan ta menciona 18 porciento di aumento di salario minimo; introduccion di BBO/BAZV/BAVP; contribucion di doño di trabou den e prima di AOV; reduccion di cantidad di oranan di trabou exigi pa ley; e diferente feenan bancario; fee den compra y benta di placa stranhero; 50% di aumento y elimincion di e plafond di benta di propiedad liber di impuesto (60 mil florin) den Grondbelasting; impuestonan riba alcohol y invoerrechten; BBO riba Seguro; a otorga mas dia di vacantia na trahadonan; aumento den tarifanan di awa y coriente. Etc.
Cu tur esaki y introduccion di un 7% adicional pa importacion, tur prijsnan na Aruba lo aumenta mas ainda.
Esaki pasobra cada gasto di compania ta bira mas pisa debi na e hecho cu cada vendor local cu ta brinda mercancia of servicio tambe lo mester aumenta nan prijsnan.
E dos organisacionnan ta bisa tambe cu poniendo restaurant- y hotelnan di e lista di esnan exclui ta descriminatorio y na mesun momento ta crea aumentonan inmenso den e “Cost of Doing Business, cual lo resulta den gastonan mas halto pa tanto local como turistanan ora cu nan bay come den un restaurant.
Ya caba den exterior ta considera Aruba un destinacion turistico demasiado caro, y e medidanan aki lo haci restaurant (y otro negoshinan) hopi mas caro ainda, aumentando e riesgo pa henter e industria.
Nan ta bisa cu si ta permiti supermercadonan transforma nan galiña importante den chicken salad cu por permiti compensa esaki for di e BBO (manera menciona den e conferencia di prensa dia 29 di juni), e ora restaurantnan tambe mester por haya e derecho aki. Pues trato igual den ley ta escencial.
Otro aspecto ta e hecho cu e limitacion den e mercancianan comercial a lo largo lo aumenta e prijsnan y un peso riba comunidad local, lo exigi cu e limitacion aki mester wordo elimina for di ley. Eliminando e termino di “handelsgoederen”, e ley ta bira menos dañino pa comercio y comunidad.
Cu e cambio ariba menciona, e ley ta mas cerca di e concepto di BTW y asina mes lo logra un aumento den entradanan door cu e ta forsa negoshinan cu actualmente ta opera di un forma informal pa paga nan importacion.
E motibo duna door di representantenan di Gobierno pa pone e limitacionnan di “handelsgoederen” den ley, ta cu Gobierno mester di mas entrada pa paga su debenan. Sinembargo, di otro banda Gobierno ta emitiendo bononan, na 6.5% di interes, pa crea capital mientras cu prestamonan na interest mas abou ta disponibel via di Hulanda. Mientrastanto, no tin transparencia riba e surplus di entrada cu Gobierno a ricibi desde cu a aumenta e BBO cu 1%.
E aumento di entrada pa Gobierno por wordo logra cu e siguiente formula combina, segun e dos organisacionnan cu a manda e carta. (A) E BBO na frontera (sin e limitacion di handelsgoederen) cu ta wordo colecta for di negoshinan cu actualmente ta opera den e economia gris y for di residentenan cu ta importa mercancia. (B) E surplus for di e 1% di aumento di BBO; (C) aumenta aplicacion di impuesto y su cumplimento. (D) Reduci gastonan di Gobierno y baha e presion poni riba comunidad pa financia pa financia e aparato gubernamental.
Na final nan ta bisa “nos ta urgi boso pa considera eliminacion di e terminologia “handelsgoederen” for di ley y elimina e exclusion di hotel y restaurantnan for di e Nota di Splicacion, pa evita un aumento di prijs inmenso na Aruba.”
