E temporada di carnaval 2023 di St. Maarten a culmina den e fin di siman aki. Un di e highlightnan, sin duda algun, ta e espectaculo di aña “Night of the Hitmakers”, cu a tuma luga diasabra ultimo den
Jocelyn Arrindell Festival Village. Miles di hende a acudi na e concierto, unda Aruba tabata debidamente representa door di e banda Buleria!
Otro artista cu a presenta e aña aki tabata VAYB, Buleria, Destra y sin lubida e banda bailabel number un di St. Maarten, esta Control Band. Esaki tabata celebracion di e di dies edicion di “Night of the Hitmakers”. Na aña 2019 a trece Buleria cava mientras cu aña pasa Claudius Philips y OREO a bolter e luga!
Tocante Vayb
E paisahe di e musica Haitiano a cambia y a enrikece su mes cu e colornan y zonido di e ocho miembronan talentoso di VAYB: Mickael Guirard como e cantante principal, Shedly Abraham riba drum, Benjamin Guirand como e maestro y alabes riba keyboard, Jude Delouches como e guitarista y vocalista principal, Sheldon Clement riba percusion, Serge Sainhilaire como e pianista principal, Frtizreynold Cadet riba bajo y Yves Andre Keslin riba e on the flor tom.
A surgi un generacion nobo di compas y e estilo di e grupo ta inspira diferente genero musical cu ta extende e culturanan y e zonidonan, aportando un combinacion fresco y innovado na e cultura Haitiano.
E carera di cada miembro di banda a inicia di un forma separa, pero nan a uni forsa pa mantene nan musica fresco pero sin laga afo e ritmo representativo di compas. Cu e icononan musical manera Mickael Guirard di Carimi y Sheldy Abraham, un di e drummernan y productor mas talentoso di e industria, e banda cu ta relativamente nobo tin como meta pa conkista tur fanatico di compas.
Actualmente VAYB tin su base na New York pero ta toca rond di mundo, mas ainda den algun ciudad di Merca mes manera Miami, Boston, Chicago, Atlanta, Orlando y hopi mas. A lo largo di su giranan mas reciente na Martinique, Guadeloupe, Francia y Canada e banda a participa den e promocion di Haitian Compas y a fortalece su presencia rond mundo.
E album debut di e miembronan di e banda, “Game Over”, ta yena cu melodia cu ta capta e audiencia, ta revela talento y e originalidad di e grupo den cada pista. Ademas ta provoca un renacemento di e compas.
Tocante Buleria
Dwight Leoneta a funda e banda Buleria na aña 2014, pues otro aña ta celebra nan di dies aniversario. E banda a produci varios cancion cu a bira hit grandi, tanto na Aruba mes como den Reino Hulandes. A gana varios premio di banda di aña, festivalnan di tumba y asina lo por sigui menciona. Esaki tabata nan di dos presentacion den e evento aki durante Carnaval di St. Maarten.
