Pa di dos aña consecutivo, IFK Aruba, den colaboracion cu Tokon Dojo, a organisa e evento di Kyokushin mas grandi di nos isla: IFK Aruba Spring Kyokushin Camp 2024. E evento aki, cual a tuma luga di 23 te cu 26 di mei, a trece hunto esunnan cu ta practica arte marcial for di diferente pais pa train bou di e guia di instructornan internacional na algun di e luganan mas bunita di Aruba.
E camp a trece hunto e instructornan reconoci, manera e Chairman di IFK USA Shihan Sean Schenker (5de dan), un coach excepcional, conoci pa su experticio tecnico y pasion pa Kyokushin Karate. Otro instructor internacional tabata Senpai Jonathan Gonzalez (2de dan), un competido internacionalmente conoci, renombra pa su estilo di ‘full contact fighting’ dinamico y su exito competitivo regional y internacional.
E sesionnan di entrenamento di e camp tabata tuma luga no solamente na Tokon Dojo, localisa den e gymzaal di Prinses Amalia Basischool, pero tambe na algun luga iconico na Aruba. Combinando e disciplina riguroso di Kyokushin cu e beyesa natural di e isla, e entrenamentonan a tuma luga na Parke Nacional Arikok, Sero Colorado, mainta tempran net pa salida di solo, Eagle Beach, unda e participantenan a experiencia e evento unico di e nacemento di e turtuganan baby y nan trayectoria pa lama y Andicuri, cual a ofrece e luga perfecto pa enfoca riba forsa y disciplina.
Aparte di e sesionnan di entrenamento, IFK Aruba tabata honra pa tabata ricibi door di nos Minister di Educacion y Deporte, señor Endy Croes, kende a reuni cu e organisado- y instructornan pa combersa mas riba e importancia di e evento aki. Su sosten a subraya e importancia di arte marcial den promove movemento y actividadnan fisico riba nos isla.
“E exito di e evento tabata posibel danki na e sosten generoso di nos patrocinadonan: Ministerio di Educacion y Deporte, Caribbean Mercantile Bank, Hertz, Setar, Marriott Aruba Resort, Pelican Adventures, y PrintMedia. Un agradecimento special ta bay tambe na tur famia y amigonan di nos Dojo, kende nan sosten a hunga un rol crucial den por realisa e evento aki,” Sensei Zairo Ruiz a comparti.
Tokon Dojo ta existi pa hopi aña na Aruba y ta bou liderazgo di Sensei Zairo Ruiz (3de dan) y Senpai Brian Marchena (1ste dan). E lesnan ta ser duna tanto na mucha como adulto riba dialuna, diahuebs y diasabra den e gymzaal di Prinses Amalia Basischool. Importante pa menciona ta cu e Dojo ta sigui aplica e mesun balornan di disciplina y respet cu ta origina for di nos mesun instructornan y cual tin como meta principal pa pasa e conocemento di Kyokushin pa un y tur. Como tal, e lesnan pa mucha semper ta completamente gratis na Tokon Dojo.
