Dia 18 di mei 2012 a establece Tienda di Educacion cu e proposito pa percura pa mayor/educador di mucha y hoben, entre e edad di 0 pa 18 aña, cu tin pregunta tocante educacion di nan yiu, haya na un manera positivo y profesional, conseho con nan por actua na un manera responsabel den educacion di nan yiu.
Tienda di Educacion tin como meta pa yuda e mayornan/educadornan na tal forma cu nan habilidad pa soluciona problema di educacion di nan yiu ta mehora. E articulo 18 di e Tratado di derecho di mucha ta e punto di salida di e servicio di Tienda di Educacion. E articulo aki ta pone enfasis riba desaroyo y educacion di mucha y e responsabilidad di mayor of tutor legal. Tienda di Educacion ta sali for di e punto di bista cu tur mayor/educador tin e boluntad, habilidad y talento pa yega na solucionnan responsabel.
Manera ta conoci tur aña mundialmente ta celebra dia internacional di famia den luna di mei. Pa e hecho aki Tienda di Educacion, celebrando di 9 aniversario, ta enfoca ariba e famia, cu ta e pilar di un comunidad. Desde cu e organisacion a cuminsa brinda servicio na comunidad di Aruba na 2012 a tuma nota di un crecemento gradual den e necesidad pa brinda un sosten y guia na sea mayor/educador of pareha pa locual ta trata lantamento di un mucha. Pues e reto di hopi famia ta keda e esencia di formula un solo pensamento ora ta trata lantamento di un mucha. Ora cu dos persona bira pareha tin 2 diferente trayecto di bida cu kisas ta contrario di otro. Si acaso cu e pareha dicidi di amplia y bira un famia cu yiu(nan) lo pone un tension si acaso tin diferencia grandi di opinion den lantamento di mucha. Ta importante pa tene na cuenta pa prome cu dicidi pa amplia e famia di palabra kico si of kico no ta aceptabel na bienestar di e mucha. Tambe tin e otro banda di medaya cual ta na e momento cu lo tuma decision di separa. Prome cu yega na separacion ta consehabel pa palabra con lo ta bay atende cu tur locual ta trata e bienestar di e menor. Pues comunicacion ta keda esencial den tur fase di un relacion, hasta despues cu esaki termina den caso cu tin yiu(nan) envolvi.
Famia, e pilar di comunidad cu merece di wordo respeta, stima y cuida. No ta solamente den e luna di mei esaki ta un prioridad den cada hogar pero esaki ta prioridad di semper. Corda traha tempo pa t’ey cu famia. Sea ta hunto na lama, na cas hungando wega di mesa of canando hunto den naturalesa. Loke nos planta nos ta cosecha. Pues duna atencion (planta) pa ricibi afeccion y amor (cosecha) di famia. Un planificacion di sea siman of luna lo por yuda pa haya un miho bista con e tempo ta dividi. Un balansa den cantidad di tempo pa bida personal, bida familiar y bida profesional ta hopi importante. Tienda di Educacion ta duna un palabra di danki na comunidad di Aruba henter pa e confiansa duna na e organisacion desde inicio di su servicionan na 2012.
Un palabra di danki y pabien ta bay tambe na e Hunta di Directiva cu den forma boluntario ta duna nan aporte na bienestar di e organisacion y na su turno e organisacion ta traha na bienestar di nos comunidad. Tienda di Educacion ta ofrece su servicio telefonico via 161 anonimo di dialuna pa diabierna, ta ofrece charla na mayor/educador manera tambe na diferente organisacion. Tienda di Educacion tin un laso estrecho cu otro organisacionnan cu tin como meta e derecho di mucha. Via media social, e.o. FaceBook, Instagram por sigui Tienda di Educacion pa keda bon informa tocante diferente fase di desaroyo pa cu lantamento di mucha.
Bienestar y siguridad di nos muchanan ta e responsabilidad di nos tur! Yama 161 pa cualkier pregunta tocante lantamento di mucha y hoben. Tienda di Educacion t’ey pa duna conseho y guia. Cuida bo salud, alimenta bo mente cu positivismo y busca e balansa! Danki pa e confiansa brinda na nos organisacion y nos ta keda cu e mesun animo y pasion pa sigui cu nos meta di sostene mayor/educador den e tarea di lanta un yiu.
