Diasabra mainta alrededor di 6:00 am polis a presenta na un cas situa den e compleho Gold Coast na Westpunt, p’un caso di ladronicia. Na yegada di polis na Gold Coast #95, a topa c’un famia rabia y cu hopi miedo.
Ta trata di un famia Italiano cu a bin Aruba pa shete dia. Nan ta cuater adulto mas un baby. Apenas nan tin cinco riba nos isla.
Tata di e baby alrededor di 3:00 am a scucha su baby ta yora, a bay atende cu ne n’e piso ariba. El a dicidi di baha bin abou den cushina p’e trah’un botr’i lechi p’e yiu.
Ey e situacion a sinta. El a topa cu dos ladron bisti na preto cu pechi riba cabes den accion. Pues, di un forma of otro a logra drenta cas sin cu e famia a tuma nota. Famia ta ariba ta drumi y ladron ta fiesta abou. El a dal un grito di spanto y core bay bek ariba. E ladronnan no a atac’e pero a core bay mesora.
A horta un renchi di oro y a bay cu €100 cash. E famia desde e momento ey no por a drumi mas. Nan ta den susto. Pa colmo, ta nan prome biaha cu nan ta bishita nos isla. Ta trata aki di un famia trahado kende sa biaha rond mundo, pero e biaha aki a dicidi di bin bishita nos dushi isla. Sigur un situacion lamentabel y pronto nan ta bay bek cas cu un sabor amargo di nos isla.
E ladronnan a logra pa siguridad no capta nan, asina mes cu Gold Coast tin hopi siguridad, tanto na entrada, esta, no ta laga ken cu ta drenta, pero ta suppose di tin control paden tambe. Cu golf cart ta patruya den henter e villa. Con bin siguridad a faya di e tiro aki, ainda no ta conoci.
Polis a tuma dato y a keda di manda e ekipo special pa sigui den contacto cu e turistanan, pa tene nan “up to date” di tur desaroyo di e caso.
