E parlamentonan di Aruba, Corsou y Sint Maarten ta programa pa reuni na Philipburg, Sint Maarten dialuna 23 y diamars 24 di October den cuadro di reunionnan Tripartiet. Manera conoci, Horcan Tammy a causa cu tin un alerta awor na Sint Maarten na unda cu aeropuerto a cera te cu diadomingo 9’or di mainta cu ta premira nan lo habri bek nan operacionnan.
Ultimo biaha cu e parlamentarionan di Aruba, Corsou y Sint Maarten a topa otro e aña aki tabata pa reunion IPKO cu a tuma luga na Hulanda unda a trata entre otro con por mehora situacion of asisti studiantenan cu retonan cu nan ta confronta ora di yega Hulanda, tema Climatologico y Siguridad di Data tambe entre otro. Manera costumber prome cu e IPKO e tres parlamento di e islanan a organisa un tripartiet.
E progama pa e Tripartiet-Overleg venidero ta consisti di un recepcion di bon bini riba dialuna, sigui pa un programa mas extenso diamars cu lo keda habri pa e presidentenan di Staten di cada isla respectivamente. Den e programa tambe ta planifica pa dialoga riba varios punto manera e Geschillenregeling, trafico aereo entre e islanan por medio di un presentacion pa Dutch Caribbean Cooperation of Airports (DCCA).
Tambe lo bini un presentacion y discusion tocante Caribisch HUB pa salud publico, crisis y calamidad, capacidad di personal di cuido y aliansa di Dutch Caribbean Hospital, cu un presentacion di Minister di Salud, Asuntonan Social y Labor di Sint Maarte, Omar E.C. Ottley.
E reunionnan tripartiet lo trata algun tema mas entre otro relaciona cu reorganisacion di sistemanan di impuesto y mas, clausurando atardi cu un conferencia di prensa y anochi un dinner entre parlamentarionan. Divi Little Bay lo ta sede di e tripartiet e aña aki na Sint Maarten.
