Un aspecto cu Otmar Oduber a cuestiona durante su conferencia di prensa tabata e forma di otorgamento di tereno. Pero mas cu tur cos unda cu e ex-minister di Infrastructura Marisol Tromp a privilegia su ruman, mientras cu otronan no tin e mesun privilegio aki.
Oduber no ta compronde con ta pasa unicamente 70 acta di tereno, siendo cu bou di su maneho el a yega na pasa te 350 acta pa aña “sin mira kende e hendenan ta, sin wak nan color politico of si nan ta amigo.” Y a agrega cu tabata trata tur hende sin discriminacion.
Cu un sonrisa sarcastico e politico a menciona cu el a tuma nota di declaracion di un grupo di parlamentario cu a haya un presentacion na Departamento di Infrastructura y Planificacion (DIP). E grupo na final a bisa cu “awo cos ta canando bon y a duna 70 tereno”. E ta hari pasobra loke nan no ta bisa ta cu a nenga mas di 800 peticion pa tereno. Unda excuus pa nenga ta pasobra door cu tabata den pandemia di COVID y despues tabatin un investigacion.
Asina el a produci con Minister Marisol ta ricibi un carta director di DIP dia 8 di juni, pero fecha 5 di juni, y inmediatamente ta firma “akkoord conform” pa duna e compania un extension di cuater luna (prolongacion) riba su opcion pasobra tin COVID. E no ta compronde di con a nenga 800 peticion pasobra tabatin COVID y pa su ruman si e minister ta firma extension. Pero tambe a para y blokia mas di 40 peticion di tereno comercial. E compania pa kende el a firma ta Expand Communication Services di Lelicia Tromp, ruman muhe di e minister. “Pa 800 hende e no por a firma pasobra tabatin COVID of investigacion, pero di su ruman muhe chikito el a firma di biaha pa haya su tereno. Y abo kier entrega keho contra mi persona,” Oduber ta puntra.
Na final el a menciona cu a papia di 27 acusacion y solamente a keda un. E ta mustra cu Ministerio Publico mes a mira cu e ta gaña.
