Un di e topiconan mas discuti e ultimo dianan aki ta e tratamento di e ley pa matrimonio di mesun sexo. E no ta un secreto, manera e topico aki a presenta, e ta kibra union den mayoria cas y hasta den parlamento. Entre otro e coalicion di MEP y RAIZ, nan no ta riba mesun liña pa e topico aki. RAIZ a uni cu Accion 21 di oposicion pa yama atende cu e topico aki.
Ultimo ainda a manda un carta pa presidente di parlamento pa puntr’e con leu e ta pa yama e reunion. Tur cos tabata cla for di october 2023 pa yama e reunion, pero Vrolijk a contesta cu pa fin di januari of comienso di februari e lo yam’e. Claro, e ta cumprando tempo, pasobra e sa cu e topico ta un dolor di cabes den coalicion.
Otmar Oduber ta di e plataforma PAIS, alabes ta un politico cu hopi experencia, a fungi como parlamentario pa hopi aña cu AVP, djey a bira minister bou gobernacion di AVP, el a sali di AVP, lanta su propio partido y djey forma gobierno cu un di su opositornan mas grandi, esta MEP. Awendia, sospechoso y despues di sali di politico, ta mira su entrada un biaha mas.
Oduber recientemente a comenta cu e ta un catolico y ta kere 100% den Dios, pero tin cu separa estado cu religion. Ley ta algo cu tur hende mester respeta y ora ta trata di e tema aki, nos tin cu respeta tambe. Constitucion ta bisa bon cla, no ta aceptabel pa discrimina ningun hende no obstante nan religion, pensamento politico of nan preferencia sexual. Mester tin espacio pa aproba e ley aki p’asina e grupo aki tambe ricibi su derecho. Ta cuestion di respeta otro y ley ta algo cu nos tur tin cu respeta. Awo, si e ley den e propio coalicion no ricibi sosten, e ora e coalicion tin cu trek su conclusion si ainda tin motibo pa tin un gobierno entre MEP y RAIZ of no.
