Reportero Leo Geerman a combersa cu Mary-Ann Falconi-Rasmijn kende ta co-fundador y general manager di Impac Hub, tocante un workshop cu ta hiba e nomber di “O’stad 200 incubator”
E representante a conta mas di e programa “O’stad 200 incubator” cu ta un programa diseña pa entrepreneurs (personanan cu ta desea di cuminsa of maneha nan propio negoshi) di Aruba, ofreciendo conocemento, training y “workshops”. E intencion ta pa yuda e companianan pa acelera nan crecemento y na final pa por yuda diversifica e economia di Aruba.
Falconi-Rasmijn ta mustra e concepto di un “incubator” ta; cu ta crea oportunidadnan si bo ta doño of si tin un idea pa habri un compania; ta pasa door di un proceso di “incubacion”, unda ta haya trainingnan y tur e conocementonan cu mester tin, incluso e hermentnan pa asina ta miho prepara pa na momento cu habri bo compania, of si ta e caso cu bo tin un compania caba, pa asina por yuda bo compania ta miho prepara.
![](https://24ora.com/wp-content/uploads/2024/06/CK8A3881-1920x1280.jpg)
E topiconan cu lo cubri durante programa den e proyecto aki; cuminsando cu un sesion di informacion y motivacion cu lo cuminsa 1 di juli venidero, cu lo tuma luga na Universidad di Aruba, den e sala di Maria Convent, unda lo facilita tur informacion di loke por spera durante e sesion educativo, como tambe con mester ta prepara pa por participa den e proyecto grandi aki.
Lo cuminsa dia 1 di juli 2024 cu e prome sesion, sigui riba dianan 8 y 9 di juli cu dos sesion mas cu ta e “introduccion na entrepreneurship”, como tambe lo tin introduccion pa esnan cu ta bay den categoria di “scale ups”.
Ta tene cuenta cu tin e periodo di vakantie, y na momento cu aña escolar nobo cuminsa lo reanuda e lesnan cu lo sigui te alrededor di 15 di november. Durante final di luna di november lo termina e programa cu e “grand pitch”, unda cu e participantenan lo presenta nan ideanan despues di a pasa door di e periodo di “incubacion” (preparacion). Durante e final participantenan lo participa den un presentacion dilanti un panel di hurado, cu e oportunidad pa cada categoria tanto di e categoria di “start up” y “scale ups”, cu oportunidad pa gana 10.000 florin.
E sesionnan ta varia, lo tin total 10 topico, durante cada topico tin 5 pa 6 “training” cu lo duna – cu ta cay bao di e topico, por ehempel ta cuminsa cu:
- Introduccion pa entrepreneurship
- Refina bo idea pa bo compania
- Aspectonan legal y finansa
- Marketing Plan: Con por skirbi bo business plan
- Con pa presenta bo mes: (Sales & Marketing)
- Networking: Establece un red di contactonan
E costo di inscripcion pa e categoria di “startups” ta Afl. 350 cu ta inclui e parti di inscripcion pa e sesion educativo di “incubacion” – Pa e categoria di “scale ups” e costo ta Afl. 500 cu tambe ta inclui e parti di inscripcion pa e sesion educativo di “incubacion”.
E proceso di registra online ta facil; bishita e website: www.ostad200.com y bay na e area di “Registra” (Register) .Ta yena un formulario y ta ricibi tur informacionnan si den caso tin un “business plan”, por manda e “business plan” via e formulario on-line. Ta pidi durante e proceso cu ta “upload” documento, pa por “upload” e papel di 5 florin di Censo (Uitreksel Bevokingsregister). E organisacion educativo lo tuma contacto cu e aplicantenan.
![](https://24ora.com/wp-content/uploads/2024/06/CK8A3883-1920x1280.jpg)
Na tur persona cu a registra lo pasa door di un proceso di evaluacion, for di e proceso aki lo scoge 20 participante pa e categoria di “start up” y otro 20 participante pa e categoria di “scale ups” Lo tuma contacto cu tur esnan scogi cu lo forma parti di “O’stad 200 incubator”. Entre e 20 participantenan di cada categoria lo competi pa e premio di 10.000 florin como premio, tanto pa e categoria di “start up” y “scale ups”.
Tin cu subraya cu e competencia pa ambos categoria (start up y scale ups) ta un proceso completamente separa for di e registracion pa e sesionnan educativo.
![](https://24ora.com/wp-content/uploads/2024/06/OSTAD200-Incubator-Flyer-1116x1440.jpg)
Falconi-Rasmijn ta mustra cu e meta di e sesionnan educativo ta pa e bienestar di e propio persona; pa ta miho prepara y como tambe por participa pa gana un premio den forma di un capital, pa un comienso di e compania of crecemento di e compania di e futuro empresario.
E proyecto aki ta den colaboracion cu Impac Hub Aruba, Universidad di Aruba, Camara di Comercio, Ministerio di Asuntonan Economico-Communicacion y Desaroyo Sostenibel. Hunto a firma un acuerdo na aña 2022 pa trece un programa di e magnitud aki pa pueblo di Aruba cu cooperacion di e sponsornan.
![](https://24ora.com/wp-content/uploads/2024/06/CK8A3877-960x1440.jpg)