Awe mainta Mando Policial di Cuerpo Policial Aruba y Sindicato di Polis (SPA) a bini hunto na mesa pa reuni riba ultimo detayenan pa e Parada Nacional di Luz. E idea tras di esaki ta pa ambos partido ta riba e mesun linea pa cu e parada menciona.
E Parada Nacional di Luz diasabra awor 26 di februari tin permiso di 8:00 pm te cu 2:00 am riba 27 di februari 2022. Cuerpo Policial Aruba su unico tarea principal ta pa mantene orden publico.
Polis ta cera e ruta caminda e parada lo pasa for di 6:00 pm pa 3:00 am. E ruta di e parada aki ta cuminsa na altura di Aruba Entertainment Center riba Caya Milio Croes direccion Vondellaan y via L.G. Smith Blvd te cu Turbo Rotonde na altura di Wendy’s. Na altura di ex-DOW na Paardenbaaistraat lo para e musica di e banda y e grupo mes lo sigui cana bay abou te cu Turbo Rotonde.
Polis no lo pusha e parada y tampoco lo saca e parada. Esaki ta responsablidad di esun cu tin e permiso (Vergunninghouder). Nan, esta e portado di permiso di parada, ta obliga di percura pa e siguridad di cada participante. A haci un palabracion cu mester tin cuater (4) miembro di siguridad pa cada shen (100) participante.
Esunnan cu a pidi permiso pa e parada mester percura tambe pa vehiculo di motor den e parada mester tin tur documento na ordo manera: Belasting paga pa 2022, seguro valido, keuringskaart, chauffeur cu rijbewijs y pa percura cu e chauffeur no ta bou influencia di alcohol of otro substancia.
Cuerpo Policial Aruba a anuncia awe cu nan ta pone no menos di 150 polis riba caya diasabra anochi. Comunidad por ta trankil cu tin suficiente polis pa cada districto y pa e parada. E operacion diario di Cuerpo Policial lo ta mesun cos. Patruyanan lo keda atento y activo pa mantene orden publico. Un mensahe na comunidad ta pa ban trankil, gosa e parada aki sanamente y comporta bo mes. Celebra responsablemente!
