E luna aki ta luna di cultura decreta pa gobierno y Organisacion di Penshonadonan Publico Arubano (OPPA) no a keda sin tene nan actividad, e biaha aki, den cuadro di Dia di Himno y Bandera.
Nan miembro a bin hunto p’asina nan pasa un rato contento den nan sede situa na Primavera.
Segun presidente di OPPA, Ivo Valdes, un cantidad grandi di miembro a asisti durante e actividad aki. Tabatin por lo menos ocho autor di poesia cu a presenta nan obra. Despues e di dos buelta a sigui. Ta dia cu a celebra Dia di Himno y Bandera pasobra siman pasa tabata hopi druk.
A pensa cu hopi miembro no ta haya e oportunidad pa bin. P’esey a dicidi pa tene diabierna.
E por ta un siman laat, aunke nunca ta laat pa celebra dia di Himno y Bandera un siman despues. A probecha di e dia pa rindi homenahe na Philomena Wong, den feliz memoria, kende tabata un miembro di OPPA.
OPPA tin un comision di actividad y su presidente ta Reina Hernandis. El a comenta cu en realidad nan ta celebrando e luna di cultura y no solamente Dia di Himno y Bandera. Ta p’esey nan tin un actividad pa nan miembronan. Mainta tabata uno literario unda cu e miembronan por a bin declama un poema of conta nan mesun storia. E mester ta un obra original y e persona mester ta miembro di OPPA.
Durante di e dia, tabatin 9 participante, unda cu nan a bin cu diferente poesia y storia, vooral storia unda cu ta rebiba e pasado y demas cos di antaño. E miembronan a gosa masha hopi mes. Por a mira nan reaccion con nan tabata, sea nan ta hari of bay bek den nan memoria.
