Diabierna merdia a tuma luga un reunion di Commissie Houshoudelijke Aangelegenheden. Aki ta caminda cu e lidernan di fraccion a reuni p’asina debati y duna ‘gevoelens’ riba e nombramento di Ombudsman. E candidatonan pa Ombudsman ta:
1. Kathy Paskel
2. Jurima Bryson
3. George Croes.
Pero por lo menos for di lider di Accion 21 a comenta cu e ta sinti cu tin metemento di politica pa cu e nombramento di e Ombudsman. Segun Miguel Mansur, no necesariamente e mayoria den CHA kier sigui e conseho di presidente di Corte, Algemene Rekenkamer y Raad van Advies.
“E proceso ta corumpi y nos politiconan ta sinberguensa”, asina Miguel Mansur a comenta. Ta for di inicio a boga pa nombra y kita e Ombudsman cu diescuater voto pero MEP y RAIZ a cambi’e pa diesun voto.
CHA mes no ta duna ningun decision, ta den un reunion publico lo scoge e candidato. Pueblo mester pone hopi atencion riba e proceso aki, ta sinti hasta cu tin un fixmento. Mansur tin su preocupacion riba e claridad di e proceso. “Mi ta haya echt vies vies vies cu ni e proceso di Ombudsman por bay manera cu mester ta”, asina e lider di Accion 21 a comenta.
Di parti AVP, drs. Mervin Wyatt-Ras a conta cu for di Ombudsman tin cu conta cu un persona independiente y no cu metemente di politica. AVP kier sostene e secuencia cu e comision di seleccion a presenta. Sinembargo ta sinti cu MEP y RAIZ kier haci otro. Tin cu duna e proceso democratico pa dicidi. For di argumentonan den CHA, ta sinti cu cos no ta bayendo manera mester ta.
Di parti MAS, a combersa cu drs. Marisol Tromp, el a conta cu e comision aki ta porta cera. Tromp tambe ta para pa e proceso cu e comision di seleccion a duna y segun e secuencia. Claro, e reunion publico mes lo cuminsa despues cu e reunion culmina. Riba e comentario di metemento, Tromp a comenta cu asina tin diesun miembro di parlamento ta vota p’e Ombudsman y no diescuater, por tin duda den su nombramento. Tin cu subraya cu e Ombudsman lo tin un tarea duro caminda lo tin cu critica, keda skerpi y mas aun no obstante cua partido ta na mando. MAS kier sigura cu e proceso ta cana corecto.
Edgard Vrolijk, Presidente di Parlamento, a comenta cu e ta lamenta cu e nombernan a sali prome cu a yega den un reunion publico mes. E ta desapunta cu esaki a pasa. Segun Vrolijk, no ta asina cu e nombernan a bin segun secuencia cu ta e miho, pues no t’asina cu Paskel ta mas fuerte y George Croes esun menos. Ta candidatonan cu nan a scoge pero no ta segun secuencia ken ta mas fuerte of no. Vrolijk a sigura cu lo cana e proceso nechi p’asina Aruba ricibi su Ombudsman. Riba 8 di juli Aruba lo por sa oficialmente ken lo ta e Ombudsman pa djey sigui pa su ‘landsbesluit’ y pa september Aruba por tin su Ombudsman.
Vrolijk na final no a sconde su disgusto riba e echo cu Parlamento lo a “leak” e nombernan di e candidatonan pa Ombudsman
