Diabierna mainta, Su Excelencia Gobernador di Aruba, Alfonso Boekhoudt tabata tin bishita na Cas Ceremonial den Maria Christinastraat na Oranjestad. Ta trata aki di dos ex-gobernador, Olindo Koolman y Fredis Refunjol.
Koolman ta conta nos cu nan tabata tin un combersacion hopi ameno riba diferente topico. Naturalmente, nan no por bin den publicidad y bisa kico tur a papia. Pero tabata un reunion cu a bay hopi bon segun Koolman ta expresa, “nos ta aprecia tambe e iniciativa di dje, ta el a invita nos pa bin. Spera cu lo sigui tambe den futuro.”
Nos a puntra Koolman riba su reaccion di e desaroyo di Aruba pa loke tabata e aña aki, con e ta haya esaki a bay, di cual el a nenga di duna su comentario riba dje. “Mi ta prefera di no duna opinion ariba esey awor akinan.” Sin embargo, e ex-gobernador ta bisa nos cu den su concepto e punto di mas importante pa enfoca riba dje na momentonan aki na Aruba ta enseñansa. “Mester accento mas riba enseñansa. Esey ta e base di cualkier pais. Bon enseñansa pa bo hendenan bo ta yega hopi leu, sigur sigur. Esey ta e base, y mi ta kere poniendo mas atencion riba dje lo ta un bon punto.”
Ambos no tabata mucho habri pa duna nos un declaracion un poco mas amplio, unda nos kier a bay un poco mas kisas riba kico ta pensa di e relacion entre Aruba cu Hulanda y con cosnan ta bayendo actualmente. Nos no por a haya mucho mas di e dos ex-gobernadornan pero Fredis Refunjol na su salida toch a comparti un conseho cu nos. “Mester traha hunto, y busca un consenso. Tin hopi trabao pa haci. Si nos por haya otro, e lo ta beneficia e pais.”
Refunjol ta bisa di spera cu e ta bira un bon aña pa nos tur pone schouder bao di e problemanan cu tin. “Tin diferente problema pero conhuntamente nos por sali pa dilanti manera semper.”
