A pesar cu e ta indica den e pronostico di tempo, departamento meteorologico di Aruba ke hala atencion di publico cu den e proximo 24 ora tin posibilidad di awasero pisa na cierto parti di e isla. Un ola tropical activo ta moviendo den parti oost di Caribe y lo pasa cu mayoria di weer noord di nos isla. Sinembargo, e humedad y instabilidad cu e ta trece cu ne lo bay ocasiona awasero cu por ta localmente pisa na cierto parti di e isla y forma molester.
Pa loke ta lama tin cu bisa cu debi na e biento, calcula na escala di Beaufort 6 te 7, cu ta 22 te 33 nudo y awasero cu e sistema aki ta bay trece cu ne, lama lo ta poco bruto specialmente n’e partinan oost te noordwest di costa durante e pasamento di e ola tropical aki.
E olanan lo yega 6 te 7, kisas 8 pia. Tambe ta pidi pa tene cautela cerca of den awasero ya cu lama lo bira bruto specialmente den yobida fuerte y cu ta compaña pa lamper cu strena. Un aviso pa boto chikito lo drenta na vigor awe tardi 6:00 pm t’e proximo aviso.
