E fecha di 17 di november ta un fecha importante y conmemorativo pa e Departamento Gubernamental di Propiedad Intelectual. Riba e dia aki ta recorda cu 30 aña pasa e oficina a habri su portanan pa duna servicio na publico. Pa celebra e acontecimento grandi aki, OPI ta bay tin un ‘Open Dag’ pa publico riba diabierna 17 di november 2017, cuminsando for di 9’or di mainta te cu 4’or di atardi.
Kico ta Propiedad Intelectual y pakico mester registra bo creacion na OPI?
Nos Tata di Cultura Sr. Juan Chabaya Lampe, miho conoci como ‘Padu del Caribe’ a yega di bisa: ‘No keda drumi riba un bon idea. Traha riba dje pa e por briya manera un strea’.
Propiedad Intelectual tin di haci cu creacionnan di e mente, por ehempel:
– obranan literario y artistico (Copyrights), pero tambe entre otro;
– simbolo, number y imagennan cu ta ser uza den comercio (Marca, Trademarks) y
– inventonan (Patent).
Propiedad Intelectual ta ser proteha pa medio di ley, por ehempel mediante e Ley di Patent, Ley di Derecho di Autor (Copyrights) y Ley di Marca (Trademarks) cu ta permiti pa obtene reconocimento of ganashi (royalties) pa e invento of e creacion. Door di ekilibra e interes di innovadornan y e interes di publico, e sistema di propiedad intelectual ta percura pa stimula un ambiente adecuado pa creatividad y innovacion. Ta dividi Propiedad intelectual den dos categoria:
1. Propiedad Industrial
Propiedad Industrial ta encera, marca, diseñonan industrial y patent di invento
2. Derecho di Autor (Copyrights)
Derecho di Autor ta encera:
– obranan literario (por ehempel buki, poesia, tesis, obra di teatro, pelicula y cancion);
– obranan artistico (por ehempel obra di man, dibuho, pintura, potret, coreografia y escultura);
– diseñonan arkitectonico.
E derecho di propiedad intelectual ta permiti e creador of doño di un patent, marca of derecho di autor pa gosa di e beneficionan di su obra of inversion realisa en conexion cu un creacion of invento.
E ‘Open Dag’ ta tuma luga na Oficina di OPI situa na Adriaan Laclé Blvd. 3, Oranjestad (poco panord di e monumento di schutters y otro banda di sinagoga “Beth Israel”). Pa mas informacion por tuma contacto cu OPI na tel: (297) 583-1200.
e-mail: [email protected]; www.opi-aruba.org
