Desde cu Parlamento di Aruba unanimamente na aña 2021 a aproba cambionan den e ley ‘Landsverordening Beperking Tabaksproducten’, a cuminsa cu e preparacionnan necesario pa haci cu por supervisa e ley aki debidamente. Pa por bay haci e supervision aki posibel, a percura pa forma ocho ambtenaar di Dienst Warenkeuring en Hygiene di DVG den Bijzonder Opsporingsambtenaar (BOA). Cu nan estudio finalisa y nan Ministeriële Beschikking den man, e ambtenaarnan particular aki tin e autoridad pa supervisa y actua ariba leynan y regulacionnan cu ta regarda nan tarea specifico. Den e caso aki nos ta papia di e ley Landsverordening Beperking Tabaksproducten. Esaki nifica e.o. cu e ambtenaarnan aki por investiga si un violacion di e ley a wordo cometi di manera cu nan por traha un procesverbal of skirbi un boet. Na e momentonan aki DVG ta bezig trahando riba e proceso necesario pa comerciantenan por haci peticion pa “ONTHEFFING” manera cu e proceso aki ta cla lo informa esaki debidamente na sector di comercio.
Den e siguiente dianan nos dilanti, e trabounan necesario ta continua pa informa comerciantenan y comunidad kico e ley ta stipula, manera e.o.
– No ta permiti benta di sigaria of cualkier producto cu ta contene tabaco na ciudadano menor di 21 aña.
– Benta di sigaria los no ta permiti mas, sigaria mester wordo bendi den su envoltura cera y seya.
– Humamento den e lugarnan publico no ta permiti cu excepcion si e establecimento tin permiso pa tin un espacio special asigna pa humado.
– Dunado di trabao ta responsabel pa proteha empleadonan for di huma di sigaria durante ora di trabao y riba tereno di trabao
Ta prohibi pa menor di edad traha den negoshi cu ta bende producto di tabaco. Si ta un mini market, ta prohibi pa menor di edad traha den e area aparta pa bende producto di tabaco.
Ta prohibi pa parti productonan di tabaco gratis
Ta prohibi pa huma den transporte priva ora cu tin menor di edad den auto.
