Iglesia Catolico semper ta sostene e expresionnan artistico den diferente manera. Esaki nos por mira incluso den nos misanan tanto local como internacional.
Expresionnan artistico no ta keda representa solamente pa medio di arte pero tambe pa via di e capacidad humano cu Dios a regala hende i cu ta keda expresa pa medio di canto, baile, comedia, musica y diferente otro manera. E ser humano ta uza e capacidad aki pa e por ta creativo, ofreciendo constantemente e cosnan nobo cu ta refleha bunitesa y e aspecto social di e ser humano.
Carnaval ta un actividad cultural pa medio di cua e ser humano por expresa su don di creatividad. Obispado di Willemstad ta reconoce cu no solamente e ta un actividad cultural cu ta presenta su mes prome cu e temporada di ayuno y oracion cu ta Cuaresma, pero tambe cu e Catoliconan a bin ta participa tanto den marcha como publico cu ta disfruta canto di caminda.
Iglesia nunca a condena Carnaval. Pero loke si cu constantemente Iglesia a para keto riba dje y ta urgi pa drecha, ta e degradacion cu ta trece den e celebracion aki pa medio di e baile- y disfraznan indecente y algun cancion cu e letranan no apropia, pero tambe uzo excesivo di alcohol of substancia ilegal cu por hiba na comportacion agresivo.
Algun lo argumenta cu pa motibo di e combersacionnan no corecto y cu constantemente ta bini dilanti, ta mas miho pa un persona mantene su mes completamente aleha for di Carnaval. E posicion aki ta un manera pa presenta un contesta na e situacion actual pero ta core e risico di perde esunnan realmente culpabel pa e situacion aki, cual ta nos como ser humano y e cultura cu ta impacto esaki.
Pa mas lesa TREMPAN.COM.
