Departamento di Economia, Comercio y Industria (DEZHI) ta den preparacion pa forma hunto cu expertonan den diferente ramo, un Plan Strategico Nacional (NSP). DEZHI ta haci uzo di e Metanan Mundial pa Desaroyo Sostenibel (SDGs) como base pa e NSP y den cooperación cu eSDG commissie pa Aruba.
E NSP tin e nomber Nos Plan, Nos Futuro, cual ta parti den tres periodo: 2019-2022, 2023-2026 y 2027-2030. Na e momento aki ta trahando hunto cu diferente stakeholders den tres diferente comision di experto (EXWG). Nos tin como meta pa hunto den cooperación cu e diferente stakeholders produci e plan strategico nacional cu lo trece e diferente manehonan riba terenonan social, economico y di medio ambiente di tur ministerio den un forma coherente pa e implementación di actividadnan specifico pa logra e SDGs.
E partnernan den diferente EXWG a wordo nombra pa medio di un Decreto Ministerial. Cada EXWG ta wordo coordina door di un beleidsmedewerker di e seccion di Planificacion di DEZHI. E EXWG-nan ta consisti tambe di un representante di minister di Economia, Finansas y Cultura, uno di minister di Enseñansa, Sciencia y Desaroyo Sostenibel, un miembro di Innovation Team y otro miembronan segun e siguiente pilarnan:
- EXWG People: Departamento pa Asuntonan Social, Departamento di Salubridad Publico y Departamento di Enseñansa;
- EXWG Prosperity: DEZHI, Departamento di Labor y Investigacion, DIMAS, Camara di Comercio y Banco Central;
- EXWG Planet: Departamento di Naturalesa y Medio Ambiente, Departamento di Infrastructura y Planificacion, Departamento Meteorologico Aruba y Crisis Management Office Aruba (Bureau Rampenbestrijding).
Den e siguiente fase di EXWG lo involucra stakeholders di sector priva y otro NGOs y tambe lo traha riba e otro dos pilarnan: Peace y Partnerschip. Na final di e proceso lo alinea e resultadonan cu otro y tambe cu e Multi-Annual Planning & Control Cyclus (Meerjarenbegroting) di Departamento di Finansas.
Den cuadro di e trabounan necesario pa yega na Nos Plan, Nos Futuro, DEZHI conhuntamente cu e miembronan di EXWGs ta invita expertonan di sector priva y NGOs na Aruba pa participa den e proceso aki como stakeholder. Na a ricibi un email pa participa na e evento cu e posibilidad di inscribi directamente via un link den e email.
