Ta locual hopi tabata pensa y comenta riba red social como den comunidad, despues di e suceso na Montaña, caminda un mama a yega tur na sanger warda di polis pa pidi auxilio. E hoben mester por ta sufri di cualkier crisis emocional/mental of ta un persona cu ta bou tratamento y pa un motibo of otro algo a bay robes. No a descarta uzo di droga tampoco, cual a resulta di ta corecto tambe.
Ta netamente esaki mes a tuma luga y lamentablemente tin di menciona cu no ta prome biaha riba nos isla y cu cada biaha e situacion ta bira mas alarmante.
E mama, e victima den e caso aki, a pasa den algo cu ningun mama kier pasa aden. For di mainta cu a cuminsa mira cu e comportacion di su yiu ta bayendo den un direccion preocupante, el a presenta na Respaldo, cu awa na wowo, pa busca ayudo di e profesionalnan den e ramo.
E mes un mainta cu e drama familiar a tuma luga, e mama a dicidi di bati na porta di Respaldo pa asina mira si di un forma of otro nan por atende cu su yiu, cu ta un pashent, cu ta den un crisis mental e momento ey y cu ta den necesidad crucial di ayudo medico. E contesta tabata un baño di awa friu pa e mama.
“No tin tempo pa atende cu bo yiu”, y di e forma aki a manda e hoben bek cas cu tur e consecuencia cu a tuma luga despues. No ta secreto cu Respaldo pa basta tempo caba ta pasando den dificultad, tanto operacional como financiero. Ademas cu gobierno tampoco a facilita sosten y pone e instituto den posicion ainda mas vulnerabel di locual nan tabata caba.
Tin di corda cu Respaldo, algun tempo a tras a duna di conoce cu nan tabata berdad hopi atrasa y cu un ‘wachtlijst’ di por lo menos un aña pa yega na ricibi servicio. No ta conoci si entre tanto e periodo di espera lo a baha poco pero mirando tur e casonan cu a bin ta scucha y locual a tuma luga e siman aki, por decifra cu mucho no lo a cambia.
Locual cu ta lamentabel/condenabel cu hende inocente ta bira victima, ta confronta problema familiar serio, sufri cu situacion di desesperacion/angustia y hopi biaha depresion debi na e impotencia cu e situacion aki ta pone nan aden. Tanto pa e pashent como esunnan directamente envolvi manera famia, amistad y conoci. Di mira cu nan ser keri tin mester di ayudo medico, tin mester di intervencion di e instituto cu ta capacita pa atende cu enfermedad/padecimento/crisis mental y hustamente nan ta nenga di atende den momento crucial asina y debi na e decision ey un hende por poco a perde su bida na man di su mes un yiu.
E victima a pasa den un situacion hopi delicado. E tabata malamente herida cu varios hinca profundo na diferente parti di su curpa. Den e estado ey, tur confundi y traumatisa a para band’i caminda cu intencion pa busca ayudo. Un persona cu a pasa den e area y a tuma nota di su situacion a para y mesora a transporte warda di polis Shaba pa asina e bati alarma na autoridad.
E caso aki por a caba cu consecuencia fatal y esey no tin ningun duda riba dje. Como cu e mama a sali for di e cas pa scapa su bida y busca ayudo, awe por conta e storia. Pero e suerte aki no por sigui mara na dje pasobra tardi of tempran e suerte aki ta caba. El a pasa caba y lo sigui pasa si no actua y trece cambio den e sistema cu ta atende cu salud mental.
E ta un tema cu cada biaha cu e lanta cabes, ta bolbe tira santo den wowo, pero cada biaha e situacion ta bira pio.
