Ora nos lesa e palabra di Dios, nos ta mira con Dios ta avisa nos tocante respet, y pa honra nos tata y nos mama.
Y ora nos wordo spierta, esey ta pa nos tene cuenta, pa nos mes, nos hogar y nos famia.
Den Romanonan 12:2 Dios ta spierta nos: Y no sea conforme e mundo aki, ma sea transforma, pa medio di e renobamento di boso mente, pa boso por comproba kico ta e bon y agradabel, y perfecto boluntad di Dios.
Awor cuanto hende ta tene cuenta cu esaki? Cuanto hende kier e perfecto boluntad di Dios den nan bida? Cuanto hende kier sali for di e sistema di mundo?
Pasobra sin luz ningun hende no por sali for di scuridad, y Cristo Hesus ta e luz pa mundo henter, e unico mediador entre Dios y hende.
Dios ta bolbe spierta nos atrobe y hopi ta cera, wowo, horea, hasta chercha y haci bofon, y mas ainda ta consenti cu otro contra e palabra di Dios.
Den 2 Timoteo 3 :1-5 ta para skirbi:
Ma sabi cu den e ultimo dianan, temponan trabahoso lo bini,
Pasobra hende lo ta estimado di nan mes, estimado di placa, gabado, arogante, blasfemado, desobedecido na mayornan, ingrato, impio, sin amor, ireconciliabel, cu mala lenga, sin dominio propio, grosero odiado di locual ta bon, traidor, imprudente, soberbe, mas bien estimado di placer cu estimado di Dios.
Cu tin apariencia di ta religioso berde, ma cu ta nenga su poder, evita e sorto di hende nan aki.
Awor nos ta bibando den temponan trabahoso,y nos tur por mira con actitud di hende a cambia.
Hende no ta respeta Dios.
Hende kier haci locual cu nan kier.
Hende ta reta Dios, caminda e palabra di Dios ta bisa pa stop y aleha for di maldad, y inmoralidad hende ta continua, mescos cu nan no sa.
Hende ta yama scuridad luz, pensando cu asina nan por sigui sconde den maldad.
Por ehempel na tur parti di mundo caminda cierto droga a wordo legalisa, hende ta e victima, hende a bira manera zombie. Hende ya no ta responsabel mas pa nan actonan.
Hende ta comporta nan mes manera animal, pero toch hende ta sigui apoya bagamunderia.
Pregunta grandi ta surgi: Con nos hobennan por renoba nan mente, y busca e bon y perfecto boluntad di Dios, mientras cu nan ta mira cu nan mayornan mes keto bay ta apoya maldad.
E prome respaldo y mentor di un hoben ta su mayornan, y awor si e no por wak riba su mayor su conducta y asina imita locual cu ta bon, riba ken e por wak?
Hopi mayor ta yena nan yiu su bida cu tur tipo di wega di nintendo, of otro tipo di wega, pa asina e mucha ta ocupa y no ta bay caya. Awor na unda e tempo di mayor a keda pa nan yiu,tin hopi wega violento y wega ta distancia e mucha for di mayor, pasobra e ta mas ocupa den wega, cu e ta papia cu su mayornan, y sin bo ripara bo tin un mucha robot den cas.
Cu no ta obedece, pasobra e a perde contacto cu abo cu ta su mayor, pasobra awor ta wega a bira su educador, y wega ta haci su horea duro.
E falta di respet pa Dios, ta pone nos trompica, cual hopi biaha nos ta dal pia na dje, pero ta haci manera no a sinti dolor. Pasobra Cristo Hesus ta e piedra principal, e piedra di skina, y ora nos ta kere cu nos ta mas sabi cu Dios, nos ta trompica. Dios tene misericordia.
Sinceramente,
Pastoor Marcel Balootje.
