Mira bon con boso ta cana, no manera hende bobo, pero manera hende sabi, haciendo bon uzo di boso tempo pasobra e dianan ta malo, pesey anto no sea bobo ma compronde kico ta e boluntad di Dios. (Efesios capitulo 3 vers 15+16).
Dios ta duna oportunidad na tur hende cu kier sali for di scuridad y bini na e Luz cual ta Cristo Hesus kende ta e luz di mundo. (\Juan capitulo 9 vers 5).
Tur hende cu busca ayudo serca Dios ta wordo yuda, pasobra serca Dios ningun hende no por yega cu manipulacion, pensando cu bo ta bay haci manera bo kier y cu Dios tin cu acepta tur bo locuranan.
Esey no ta berdad, e palabra ta bisa bini manera bo ta, pero bo no ta keda manera bo ta, 2 Corintionana 5:17 ta bisa: Si un hende ta den Cristo , ta un criatura nobo e ta, e cosnan bieu a pasa caba, tur cos a bira nobo.
E cambio ey lo tuma serca tur hende cu humilia nan mes, sabiendo cu nan tin fout, pero ta busca refugio den Cristo, pasobra segun bo ta siguiendo Señor e mes lo yuda drecha tur cos, segun bo arepenti y entrega tur cos na Dios.
Pedro a cana cu Hesus, pero e tabata un rato carnal y un rato spiritual, pero Hesus no a rechasa Pedro, sino e a duna Pedro oportunidad pa crece hasta despues cu Pedro a ninga Hesus. (Juan Capitulo 21).
Aki nan nos kier bolbe enfatisa , cu serca Dios tur hende tin un oportunidad , pa drecha, y hopi biaha bo no por alcansa drecha bo error di pasado manera Saulo di Tarso, kende despues a bira Apostel Pablo, pero su cambio tabata radical y aunke cuanto e a wordo persigi door di su propio hende y esnan cu no conoce e no a entrega, Pablo a bira un instrumento den man di Dios. (Hechos capitulo 9 vers 15+16).
Awor nos tur sa cu den e mundo di scuridad tin hopi atraccion, hopi engaño, hopi cos temporal, cual hende ta pega nan curazon na dje y aparta for di Dios.
Satanas a bini pa horta , mata y destrui (Juan 10 vers 10) y hopi hende ta parce cu te ainda no kier mira e seriedad cu e diabel ta traha cune, su plan ta pa destrui, fisico, mental y spiritual, pasobra e ta odia tur locual cu ta stima Dios.
Cada biaha cu un mayor bisa su yiu, kita for di caya, e contesta ta , mi mayornan no kier pa mi sali, si e mayor bisa no bay cierto caminda bo ta haña e contesta, tur mi amigo/amiga nan ta bay eynan.
Bo ta bisa bo yiu pa no cana cu arma, droga, alcohol, pero hopi biaha nan no ta scucha pasobra e scuridad ta domina nan.
Awe nos kier bisa tur hoben y nan mayor, cu di berdad e tempo ta dificil, pero esey no ta nifica cu mester perde responsabilidad, karakter, respet y bira golos pa placa y inmoral ni tampoco biba den idolatria.
Dios keto bay ta duna oportunidad na tur esnan cu kier arepenti, ricibi Cristo Hesus como nan Señor y salbador y drecha nan bida, nan hogar y henter na famia. Dios no a cambia, su amor tey pa semper.
Sinceramente
Pastor Marcel Balootje.
