Fundacion CINEARUBA conhunto cu Atleiers ’89 y cu e apoyo di Playa Liquor & Bottling Company NV ta sigui trece nochi di pelicula gratis pa e comunidad di Aruba.
E diabierna aki 30 di augustus lo tin un otro comedia na Spaño titula ‘Bajo el mismo techo’ cu ta conta e storia di un pareha recien divorcia cu tin cu keda biba cu otro bao di e mes un dak paso nan no por bende e cas. Manera tur nos otro comedianan esaki tambe ta uno cu ta garantisa harimento sin fin. E pelicula aki lo tin subtitulo na Ingles y e tin un duracion di 97 minuut. E pelicula ta clasifica como PG 13.
Manera ta custumber e nochi di pelicula ta cuminsa cu un pelicula cortico local cu ta cay bao di e plataforma Shortcutz Aruba cu tin e meta di promove peliculanan cortico local. E siman aki lo pone atencion riba e topico di violencia domestico cu e pelicula ‘No mas’ di Desiree Croes. E famoso actor local Addonsito Croes lo tey presente pa atende cu su fanaticonan. Porta di Atleliers ’89 situa na Dominicanessenstraat 34, ta habri 7:30 di anochi y e peliculanan lo cuminsa pa 8’or. Entrada ta completamente gratis.
Shortcutz Aruba ta haci un yamada na tur esnan cu ta traha pelicula cortico y ta desea di mustra nan peliculanan na un publico, por email CINEARUBA un copia MP4 di e pelicula via Wetransfer na [email protected].
