Semper e tabata asina, pero awor nos ta mir’e mas cla cu nunca, cu no tin ningun clase di poder aki na mundo cu por surpasa poder di Dios.
Mundo a anuncia cambio climatico, pero mundo no por haci nada contra dje, acaso tin un hende cu por domina e solo cu ta birando cada dia mas cayente. Nos tur ta adverti pa cuida nos mes for di dje pasobra no tin nada cu nos por haci contra dje.
Ma e dia di Señor lo bini manera un ladron, den cual e shelonan lo pasa bay cu un boroto inmenso, y e elementonan lo wordo destrui cu un calor intenso, y e tera y su obranan lo wordo kima completamente (2 Pedro 3:10). Ken por para contra esaki?
Tin hopi hende cu poder aki na mundo, poder politico,poder financiero, poder militar, poder dictatorial,poder pa laga mata e hende pober, tur esey nos conoce, pero ningun di nan por supera e poder di misericordia y bondad di Dios.
Pasobra desde creacion di mundo, Su atributonan invisibel, Su poder eterno,y naturalesa divino, a wordo mira claramente, siendo comprendi,door di loke a wordo traha, asina cu nan lo no tin excuus (Romanonan 1:20).
Hopi cu ta profesa di ta sabi, ta birando bobo, pasobra nan no kier respeta e poder di Dios, si nos wak bon e mundo ta birando den un circulo haciendo tur sorto di cos, pasobra hende ta purba domina mundo, pasobra nan no kier reconoce cu poder ta di Dios.
Y cada biaha cu hende no kier reconoce Dios, hende lo sigui trompica, te na momento cu nan reconoce cu Cristo Hesus ta Rey di Reynan y Señor di Señornan.
Ta para skirbi den Romanonan 1:28 bisando: Y mescos cu nan no a haya ta necesario pa reconoce Dios, Dios a entrega nan na un mente perverso, pa haci e cosnan cu no ta cumbini. Esey ta simplemente demostra na nos e grandesa di Dios su poder contra desobediencia di hende.
Den Galationan 5:19-21 Dios ta bolbe hala nos atencion hopi fuerte, den cual e ta avisa di antemano kende ta esnan cu lo no hereda e reino di Dios. Pasobra e hende no por kere cu Dios lo acepta pica den cielo, pica no por drenta pasobra carni y sanger no por drenta, e standarte di Dios ta Santidad y Dios no ta acepta nada otro cu no ta Santidad.
P’esey ta para skirbi den Hebreonan 12:14: Aspira pa tin pas cu tur hende, y santificacion, sin cual ningun hende lo mira Dios.
Riba e mundo aki tin hende ta pretende cu nan tin poder pero ta para skirbi: Ta E a traha tera cu Su poder,E a establece mundo cu Su sabiduria. Y cu Su conocemento El a span e shelonan. Ora cu E laga Su bos resona, tin un tumulto di awanan den e shelonan, y E ta haci nubianan lanta for di fin di tera. E ta traha strena pa awasero, y ta trece biento for di su depositonan (Jeremias 10:12-13).
*P’esey no ta existi un hende cu un posicion asina halto na mundo cu no tin cu respeta y obedece Dios.
*Ora Miriam y Aaron a murmura contra Moises, Dios a pone lepra riba Miriam (Numbernan 12:1-10).
*Pero ora Moises y Aaron a desobedece Dios, (Numbernan 20:9-12) Dios a bisa Moises y Aaron cu nan lo no drenta e tera priminti, pasobra nan no a haci locual Dios a manda nan haci.
No tin ningun poder mas grandi cu poder di Dios riba e mundo aki.
Sinceramente,
Pastoor Marcel Balootje.
