Pa Dios nada ta imposibel, tur cos cu ta den Su boluntad e ta duna, E no ta kibra ningun hende pa e lanta otro,Dios ta duna cada ken segun nan peticion, segun nan fe lo wordo duna na nan.
Ora hende purba di limita Dios, ta su mes e ta limita, y e ta gaña su mes, pasobra Dios ta grandi, poderoso y maraviyoso, fuerte y balente, y no tin ningun hende cu por compara cune.
Dios mes a bisa den Su palabra , pidi y lo bo haya, bati y lo Mi habri,y Dios nunca ta contradeci Su mes palabra, si Dios bisa algo ta pasobra e ta alcansabel pa nos.
Hende nan awendia kier logra tur cos pa via di material, uzando tactica materialista cual mundo ta ofrece nan kier logra tur cos, pero esunnan cu pidi Dios algo y spera riba Dios, semper lo tin bentaha riba esunnan cu ta depende riba material, pasobra e brasa di Dios ta mas fuerte y mas poderoso cu e material di mundo. Material ta gasta y perde balor, pero Dios su poder ta aumenta dia pa dia, (2 Cronicanan 32:7-8)
Ora ta trata di sabiduria, e universidad di Dios, ta mas grandi cu tur universidad di mundo, y e palabra di Dios ta siña nos cu Dios ta duna generosamente y sin reproche, esey ta nifica cu sabiduria di Dios ta bin gratis pa esun cu ta den obediencia na Dios. ( wak ehempel di Hose den buki di Genesis).
Ora ta trata di misericordia, gracia y pordon ta Dios mes ta e fuente, pasobra den e caso di Noe y den e caso di Sodoma y Gomorra, ta solamente Dios, por a duna gracia y fabor na e dos hombernan fiel na Dios cual tabata Noe y Lot, bibando rondona cu maldad, pero toch e maldad no tabata den nan.
Cada biaha cu nos ta acerca e trono di gracia di Dios, nos mester acerca Dios cu Fe, pasobra sin Fe ta imposibel agrada Dios.
Den Filipensenan 4:8 ta para skirbi: No preocupa pa nada: Ma den tur cos pa medio di oracion y suplica cu gradicimento, laga boso peticionnan ta conoci dilanti di Dios.
Ta bon pa nos tin e confiansa di gradici Dios prome cu nos ricibi algo di Dios, pasobra esey ta demostra fe y cu nos tin speransa den Dios.
Den Huan 14:13-14 ta para skirbi:Di berdad, di berdad, Mi ta bisa boso, esun cu kere den Mi, e obranan cu Mi ta haci e tambe lo haci, y obranan mas grandi cu esakinan e lo haci, pasobra Mi ta bay serca e Tata . Tur loke boso pidi den Mi nomber, esey lo mi haci pa e Tata wordo glorifica den e Yiu. Si boso pidi algo den mi nomber lo Mi hacie.
Huan 15:7 ta bolbe recorda nos bisando: Si boso keda den Mi y Mi palabranan keda den boso, pidi tur locual boso kier y e lo wordo haci pa boso. Den esaki Mi Tata lo wordo glorifica, cu boso ta carga hopi fruta y asina demostra di ta mi discipelnan.
Materialismo a pone hopi hende lubida algo sumamente importante Hesus a bisa den Huan 15:5 Ami ta e mata di wendruif, boso ta e ramanan,esun cu keda den Mi,y Ami den dje,esey lo duna hopi fruta, pasobra separa di Mi boso no por haci nada.
Tur hende mester ta na altura y compronde esey hopi bon, pasobra Dios ta doño di tur cos y scuridad, maldad, malicia, y inmoralidad no tin nada bon pa ofrece
