Diadomingo mainta henter comunidad a lanta den shock momento cu a tende di morto di dos hoben den accidente di trafico. Un di nan ta e hoben di diesshete aña Kevin Ruben Tromp.
Famia tabata den un shock na momento cu e noticia a drenta cu Kevin Tromp a accidenta y fayece. Kevin ta un ex-alumno di St. Franciscus College, Sint Dominicus College y despues el a bay SPO. E tabata biba na Playa hunto cu su mama, cu kende e tabata traha. E auto KIA Rio cu el a accidenta cu ne tabata di su mama.
E hoben no tabata riba un tripmento. E tabata na su cas drumi. Diripiente el a pasa man p’e auto di su mama y bay direccion pariba, unda lastimamente a hay’e involucra den accidente fatal na Savaneta. Pa 6:50 am Dr.Mungra a constata morto di Kevin Ruben TROMP, naci 12 augustus 2005, Aruba.
E mama mes no tabata sa cu Kevin a pasa man p’e auto. Kico tabata e motibo cu Kevin a bay pariba ta algo cu e famia no sa ainda. Segun famia, den ora di mainta ey mes el a sali for di cas.
