Boneiro ta suspende desde mañan 6 di augustus 2020 e ‘air-bubble’ cu Aruba. E espacio aereo ta keda habri, pero pasaheronan no por biaha liber mas di Aruba pa Boneiro. A tuma e decision aki despues cu e cantidad di persona contagia cu COVID-19 a subi drasticamente na Aruba.
Pa motibo di e tantisimo casonan nobo di COVID-19 ta mira Aruba como un pais di riesgo. Manera indica den e ordenansa di emergencia tur hende cu ta bini awor for di un pais cu riesgo halto, manera Aruba, mester bay 14 dia den cuarentena na cas.
Cu a suspende e ‘air-bubble’ ta nifica cu a wanta e palabracion tocante conexion cu Aruba. Na momento cu e situacion na Aruba normalisa por sigui cu e palabracion cu ya ta riba mesa.
Bonerianonan cu a biaha pa Aruba
Tur cu tabata na Aruba despues di 23 di juli tin cu vigila nan salud. Si tin keho por tuma contacto cu departamento di Salubridad Publico. Autoridadnan na Aruba a apunta algun caminda cu tabatin contagio. Ta trata di e sitionan Gusto Night Club, Lola/Craft Bar and Restaurant and Nightclub y Muscles and Lungs Gym.
Si tin hende na Boneiro cu durante nan estadia na Aruba tabata den un di e luganan aki entre 23 di juli y 3 di augustus 2020, nan ta obliga na meld na departamento di Salubridad Publico. Por yama number di telefoon 0800-0800.
Repatriacion
Residentenan di Boneiro cu ta na Aruba ainda, por regresa Boneiro cu un carta di dispensacion di Gezagheber. Na momento cu tin bista riba cuanto persona tin cu repatria lo dicidi con trece nan Boneiro bek. Na momento cu a habri espacio aereo a bisa cu biahamento ta tuma luga riba propio riesgo. Lo no bini sosten financiero pa esunnan cu no por regresa awor aki. Residentenan di Aruba cu ta na Boneiro ta responsabel pa regla nan mesun regreso pa Aruba.
Turista Medico pa Aruba
Pa esunnan cu ta na Aruba of tin cu bay ainda pa motibo medico lo habri un koredor. Ta trata aki di pashentnan di ZVK for di Boneiro y specialista medico. Lo transporta e personanan aki entre aeropuerto y hospital. E chens pa contagio ta hopi chikito e ora ey. Ta pidi pashentnan di ZVK pa tuma contacto cu ZVK pa haña informacion tocante nan biahe.
Condicion di biahe
Ta conseha tur Rubiano cu kier bay Boneiro y tur Boneriano cu kier bin Aruba pa pospone nan biahe. Pasaheronan cu pa un motibo of otro toch tin cu bay Boneiro, ta obliga pa yena e declaracion di salud y tin cu bay 14 dia den cuarentena manera stipula den e ordenansa di emergencia. Cu e formulario aki departamento di Salubridad Publico ta haña informacion tocante salud di esunnan cu ta yega Boneiro.
Por e formulario mester subi: https://bonairepublichealth.org/nl/form
