Duda ta enemigo di hende. Duda ta pone cu hende no ta reconoce cu ta cielo ta goberna. Den e buki di Santiago ( Jacobo) capitulo 1:5-8, Señor ta hala nos atencion fuertemente tocante di duda bisando:
Ma si cualkier di boso falta sabiduria, lag’e pidi Dios , kende ta duna na tur hende generosamenente y sin reproche, y esaki lo wordo duna na dje. Ma lag’e pidi den Fe, sin ningun duda, pasobra esun cu ta duda ta manera un ola di lama, cu ta wordo lastra y tira den biento. Pasobra no laga e hende ey spera cu e lo ricibi algo di Señor, siendo un hende di curason dobel , inconstante den tur su caminda nan.
Ora Dios bisa algo ningun hende por cambi’e, y Dios su palabra ta bisa pa nos no duda, no solamente den pidimento di sabiduria, cual ta sumamente necesario pa nos por guia nos mes bida, di nos famia y di nos yiunan. Pero den tur cos cu nos ta haci nos mester tin Fe den nos Creador, kende ta Dios Todopoderoso, esun cu a forma nos den barica di nos mama.
Un hende cu ta pidi y no ta kere, ta un hende di curason dobel, pasobra e ta pidi algo, pero eynan mes e ta duda cu e lo ricibi. Pero un cos e ta lubida cu Dios no ta hende pa e gaña, ta para skirbi cu cielo y tera lo pasa ma Dios su palabra lo no pasa.
Dios ta bendiciona esunnan cu tin fe pasobra e palabra di Dios ta bisa: Awor fe ta e siguransa di cosnan cu hende ta spera, e conviccion di e cosnan cu hende no ta mira (Hebreonan 11:1).
Un biaha mas nos kier bisa cu Dios, ta stima esunnan cu ta confia den dje, pasobra Su palabra ta bisa den Isaias 26:3-4 asina aki: Lo bo warda den pas perfecto, esun cu su pensamento ta permanece den Bo pasobra e ta confia den Bo. Confia den Señor pa semper, pasobra den Dios e Señor nos tin un Baranca eterno.
Sadrac, Mesac, y Abednego tabatin fe den Señor y Señor duna nan pas den un forno di candela, y nan tabata tira aden ma nan a sali sin un cabey di nan curpa a kima.
Daniel tabata haci oracion na Dios constantemente cu fe y a tir’e den cueba di leon. Pero e leonnan no por a mishi cu ne, pasobra Dios a manda un angel pa cera boca di e leonnan. Ora nos tin fe den Dios, Dios mes lo bira nos defensa.
Pablo y Silas despues di tabata mal bati y poni na cadena, tabata haci oracion y canta alabansa na Señor y e fundeshi di e prizon a tembla pa medio di un temblor y e cadenanan a cay y nan a keda liber.
Ora Dios permiti un prueba den nos bida,ta pa nos Fe crece den Señor, Ana den e buki di 1 Samuel 1:1-20 a pasa den un prueba cu a pone haci un compromiso cu Señor y Señor a dun’e e deseo di su curason.
Awendia hopi hende kier mira , cosnan sosode, pero poco ta kere den e poder, manera ta para skirbi: E husto lo biba pa medio di Fe, pasobra sin Fe ta imposibel pa agrada Dios.
Dios nunca a stop di haci milager, ta hende ta esun cu ta duda.
Laga nos pone tur nos confiansa den Señor nos Dios, pa nos por mira Su milagernan tuma luga.
Sinceramente,
Pastoor Marcel Balootje.
