Ta un fenomeno cu ta na moda cu tur hende kier cos pura, no kier warda, ta critica, ta mumura, ta zundra, hasta ta falta respet pa hende y pa Dios y no ta importa hende pa drenta inmoralidad y perde integridad basta nan logra locual cu nan kier.
Pero si nos mira esaki biblicamente, ta hopi tempo pasa esaki a bin ta sosode y e consecuencia tabata duro, pero door cu hende a perde temor pa Dios, y no kier arepenti, cada rato mes un fout ta wordo haci.
Beibel ta conta nos e historia di Sara casa di Abraham a sinti cu e ta bira bieu y e bisa Abraham pa drumi cu e cria Hagar y ora Hagar a sali na estado e a despresia Sarah, pero Dios cu ta husto no a tira e falta riba Hagar pasobra Sarah mes a entrega Hagar na Abraham. Y Dios a bisa Hagar cu e lo haya un yiu homber y lo bo yame Ismael . E lo ta un homber salvahe, su man lo ta contra tur hende y tur hende su man lo ta contra dje y e lo biba den presencia di tur su rumannan .(Genesis 16 vers 11+12).
Nos kier pa tur hende tene bon cuenta kico Dios ta bisa: Cual ta e tipo di hende cu lo nace for e relacion Abraham y Hagar.
Abraham tabatin 86 aña di edad tempo e a saca Hagar na estado, y despues di 13 aña ora Abraham tabatin 99 aña , Dios a papia cu ne y bis’e cu e ta bay dun’e un yiu, cu Abraham lo bira tata di un multitud di nacionnan. Abraham a mira e milager di Dios den su bida cu 99 aña y mescos Sara di edad avansa a sali na estado y a a duna luz na Isaac, pasobra Sara tabata steril.
Awor a sosode cu e yiu cu Abraham tin cu Hagar ta bisa cu e ta heredero y Isaac tambe ta bisa cu e ta heredero pasobra e ta yiu di e promesa di Dios. Y e asunto aki a trece enemistad den Medio Oriente te cu dia di awe.
Hopi biaha como mayor nos kier forsa cierto cosnan, cu depues no ta resulta, of ta termina malo.
Tur locual Dios ta manda pa nos , nos mester tin pasenshi , pa nos ricibi, cosnan di Dios, ta cosnan di excelencia y Dios tin su tempo perfecto.
Hopi hende ta bay purba suerte den idolatria/ bruheria, pasobra segun nan Dios ta tarda.
No lubida esaki :Esnan cu spera den Señor lo tin forsa renoba.( Isiaias capitulo 40:31).
Hende mester siña spera y confia den Señor pa nos bienestar, pasobra tur locual nos purba haci riba nos mes forsa, lo trece dolor pa nos.
Tur cos ta tuma tempo pa recupera,y si nos confia Dios e recuperacion lo bini pronto.
Cuanto hende no ta malo awe pasobra nan kier haci y biba manera kier y no warda riba Dios?,
Cuanto matrimonio no a bay perdi pa motibo di falta di pasenshi?
Cuanto hoben no ta sera pa motibo cu nan kier bira rico rapido pa medio di atraco y droga?
Esey ta algun resultado, pero mas tristo ta :
Cuanto hende no ta invalido awe, pa motibo cu nan kier a pusha pa nan yega cas y a causa accidente? Cuanto hoben no ta lamenta , pasobra nan tabata kier un yiu, pero despues nan a bin ripara cu ta mihor nan a warda?
Bale la pena spera riba Dios,
Sinceramente,
Pastor Marcel Balootje.
