Dios no ta interesa den nos excuus, pero den nos arepentimento, aparta di pica, cambio di actitud y crecemento. Dios ta pordona ora nos arepenti y no ora nos uza excuus.
Den Genesis 3:12 -13 nos por wak e historia di Adam y Eva caminda tur dos tabatin excuus y nos a mira kico a sosode cu nan dos. Dios a expulsa nan for di e Hofi di Eden.
Den e buki di 1Samuel:15 Rey Saul tabatin hopi excuus pa no obedece Dios completamente, pero locual cu e no tabata sa ta cu mita obedencia tambe ta desobedencia.
Hopi biaha e mayornan tin hopi excuus pa duna nan yiunan tocante nan comportacion, nan actitud violento, nan yegamento di cas burachi, nan falta di respet, ora hasta nan propio yiu ripara cu nan ta infiel na otro. Ta un berguensa ora un mayor cu mester duna ehempel y tambe coregi su yiu, mester duna excuus pasobra e no por para riba su palabra.
Hende cu tin hopi excuus ta un hende di dobbel animo, inconstante den tur su caminda nan, (Santiago1:7-8)
Hende di dobbel animo no tin e Spirito Santo (Romanonan 8:5-8) ta bisa: Pasobra esnan cu ta segun e carni ta fiha nan mente riba e cosnan di carni, ma esnan cu ta segun e Spirito, riba e cosnan di e Spirito. Esnan cu ta den carni no por agrada Dios.
Bo ta reconoce hende di dobbel animo pa nan falta di fruta, nan relacion cu mundo, cual ta produci enemistad cu Dios.
Ora nos lesa Lucas:14 nos por ripara cuanto excuus hende por tin pa no participa den cos di Dios ( versiculo 18-20).
Den Salmo119:113 David ta bisa: mi ta odia esnan indeciso, ma mi ta stima Bo ley.
Nos mester tene cuenta cu ora un hende tin hopi excuus pa no acepta Cristo y biba un bida cu ta agrada Dios e ta pidi excuus pa lo siguiente:
– Pa no bay shelo-
– Pa no ta huntu cu esnan cu a laba nan paña den sanger di e Lamchi.
– Pa no ta hunto cu e angelnan
– Pa por keda for di presencia di e Tata
Hopi biaha ora bo ta tende e excuus mi no ta cla ainda, ta scuridad di mundo tin nan gara.
– Nos lo tin excuus pa sigi biba den pica manera ta para skirbi den Galationan 5:19-21?
– Nos lo tin excuus pa no honra nos mama y nos tata?
– Nos lo tin excuus pa keda sin pordona nos prohimo?
– Nos lo tin excuuus pa venga otro, mientras cu e palabra ta bisa pa stima otro?
– Nos lo tin excuus pa biba den idolatria y bruheria mientras cu nos mester adora Dios so?
– Nos lo tin excuus pa odia nos ruman?
– Nos lo tin excuus pa nos ta infiel den matrimonio?
Cuanto excuus nos lo tin pa mentira y falta di respet?
Pasobra hopi biaha excuus ta resulta di ta mentira.
E binida di Cristo Hesus ta cerca y E no ta acepta bo excuus. Kico bo ta spera di Nos Señor Todopoderoso fiel y berdadero?
Señor Dios a manda Su Yiu Unigenito pa ken cu kere den djE no bay perdi, ma ricibi bida eterna.
Cual lo ta bo excuus na e momento cu E bini y abo no ta cla?
Djis refleha un momento y lo bo haya bo contesta.
