Diamars mainta trempan a inicia e reunion riba presupuesto supletorio 2024. E reunion a bay largo y a dura mas o menos diesshete ora pa cual a termina pasa di 2:00 am diaranson marduga. Tur parlamentario tabata presente y conseho di minister tabata casi completo. Tabata falta dos minister, esta Rocco Tjon kende ta na Hulanda p’un biahe di trabou y mr. Geoffrey Wever cu ta Surnam p’un mision comercial. Prome Minister, mr. Evelyn Wever-Croes a contesta e preguntanan cu e parlamentarionan a dirigi pa Tjon y Minister Ursell Arends a contesta esunnan dirigi pa Geoffrey Wever.
Un reunion riba su mesun cu a bay na un nivel hopi abou, cu un cantidad di insulto y politica polarisa, cual t’e mesun politica cu pueblo pocopoco ta fadando di dje. E reunion tabatin poco interes di pueblo. Pa prome, pa motibo di problema tecnico interno di parlamento, no a transmitie via Facebook. Den parlamento, e tribuna tabata bashi, cu excepcion di cuater persona. Entre e cuater personanan presente, dos ta polis y e otro dosnan ta reporteronan di 24ora.com y TREMPAN.
Locual tabata e parti cu a hala mas atencion di e reunion ta e parti di indexering. Manera ta conoci, gobierno a acorda cu Hulanda cu lo bay firma un Rijkswet y asina Hulanda como recompensa a baha e interes di e fiansa di “COVID”, pa cual Aruba a haya algun miyon bek den caha di pueblo. Pues, door di bende nos autonomia cu Hulanda, Aruba por duna bek, pues no ta asina cu gobierno di su mes kier a duna bek.
E reunion mes ta relaciona cu presupuesto supletorio di aña 2024. E reunion no ta pa gasta mas of dia mas placa, sino pa redistribui e fondonan, debi na extra entrada y adaptacion di maneho. Den esaki ta duna pueblo bek, den forma di indexering, bijstand, etc. Mientras e cifranan berdad ta miho, specialmente door di control estricto di CAft, loke si ta mahos ta nos maneho financiero, cu no por produci un “jaarrekening” desde aña 2019.
Aruba ta bayendo pa cinco aña sin cuenta anual, sin cu gobierno por comproba cu el a gasta loke el a presupuesta. Un desaroyo negativo pa cual e Minister di Finansa ta responsabel personalmente pa e tendencia aki!
Na prome instante, e presidente di parlamento a sigura cu e lo termina e reunion mirando e agenda druk e siman aki di parlamento. Awe diaranson tin un reunion di ‘Commissie Huishoudelijke Aangelegenheden’ (CHA) y diahuebs tin un reunion publico cu oposicion a pidi riba Minister Glenbert Croes, caminda kier puntr’e riba su envolvimento den e caso di Portulaca caminda hasta a drenta su oficina c’un entrada hudicial.
Pero, mirando cu tabatin profesionalnan den sala di parlamento, entre otro director di Departamento di Finansa y mas, a dicidi di “schors” te cu diahuebs. A ripara cu rond di 1:30 am, ya tabatin parlamentario cu nan wowo a cuminsa cera den sala. Pero debi na presencia di 24ora.com, nan a haya nan mes ta dal algun copi di koffie pa keda “on” den e reunion. A mira cu Misha Raymond di RAIZ su cara a trek y a reclama presidente di parlamento, pa cual, debi na presion, Vrolijk a hay’e ta “schors”.
Aguanette Gunn di MAS durante un entrevista a comenta cu el a haya masha straño dicon tabatin tanto pura cu e presupuesto supletorio aki y cu a laga e reunion bay asina laat. Tur esaki cu mirando cu den CHA, a acorda cu no lo sigui ningun debate despues di 9:00 pm. Pero e biaha aki kier a pusha e reunion pero toch no a logra. Miguel Mansur a comenta tambe riba ex-sospechoso di husticia y actual Minister, Endy Croes, casi no a ricibi pregunta di parlamento, pero e mes a invita su mes y cuminsa papia sin cu casi a hacie pregunta.
https://www.facebook.com/24ora/videos/508104408241342
