Diasabra awo grandi y chikito lo tin e oportunidad pa adopta un pushi, sea adulto of un ‘kitten’ n’e evento organisa pa Nine Lives Foundation situa na Jaburibari 8-B
Geraldine Kock, vice-presidente di Nine Lives Aruba Foundation, a splica cu e evento aki lo ta di 4:00 pa 7:00 pm y cada persona cu bin pa adopta un pushi, na entrada lo ricibi un prosecco y snacks gratis.
PA ADOPCION
Unabes cu yega na Nine Lives, un di e boluntarionan lo ta cla pa sirbi, cu lo brinda un prosecco y snacks. For di eynan ta drenta, caminda e boluntario ta bay y mustra nan e pushinan disponibel pa adopcion.
Despues cu un persona adopta un pushi chikito, ora cu e tin cinco luna, mester tuma contacto cu Kock y e ora ey e lo haci un cita p’e doño nobo, p’asina e pushi ta sterilisa y castra. Tur pushi adopta via Nine Lives, mester sterilisa of castra. Si ta un junior cat of adulto, ya e ta sterilisa of castra caba.
Pa mas informacion por tuma contacto cu nan via nan pagina di Facebook of tambe Instagram, caminda cu un di e boluntarionan lo reserva of haci cita cu un di e fosternan. E ora nan lo ta na altura cu tal pushi ta reserva.
SITUACION PENOSO
Kock a sigui splica cu den e ultimo dos luna, tin hopi problema. Nan ta haya mas di 30 pushi pa siman, caminda cu e hendenan sin curason ta dump nan. Kock a indica cu e no ta kico ta pasando. Ta un caos di berdad y ta costa e fundacion hopi trabao como tambe boluntario.
Siman pasa nan a bin haya un caha di ocho pushi cu tur nan wowo malo y tabata den solo. For di eynan mester a hiba tur ocho pushi dokter di biaha pa atende cu nan.
CUANTO PUSHI
Actualmente Nine Lives tin 53 kitten mas of menos. Aki ta papia di pushi di 4 siman bieu te cu 12 siman. Tin junior cats, cual ta mas of menos 6 pa 8 pushi. Adult cats tin mas of menos 32 pa 36 pushi mayor. Na nan colony cats, nan tin mas of menos 85 pushi.
INVITACION
Ta invita pueblo en general di e evento di Nine Lives Aruba Foundation diasabra awo na Jaburibari 8-B. Na caminda pa Parke Curason, ta pasa Tesco Foodmart, bay nort di tres cas pariba di caminda, y eynan ta haya Nine Lives Aruba Foundation.
![](https://24ora.com/wp-content/uploads/2023/05/IMG_5850-1920x1280.jpg)
![](https://24ora.com/wp-content/uploads/2023/05/IMG_5867-1920x1280.jpg)
![](https://24ora.com/wp-content/uploads/2023/05/IMG_5859-1920x1280.jpg)
![](https://24ora.com/wp-content/uploads/2023/05/IMG_5858-1920x1280.jpg)
![](https://24ora.com/wp-content/uploads/2023/05/IMG_5857-1920x1280.jpg)
![](https://24ora.com/wp-content/uploads/2023/05/IMG_5855-1920x1280.jpg)
![](https://24ora.com/wp-content/uploads/2023/05/IMG_5854-1920x1280.jpg)
![](https://24ora.com/wp-content/uploads/2023/05/IMG_5851-1920x1280.jpg)
![](https://24ora.com/wp-content/uploads/2023/05/IMG_5828-1920x1280.jpg)