Dialuna tur colega di Smart Systems a habri un siman yena di positivismo y alegria, di gradicimento na Nicole Hoevertsz, pa a haci un soño di nan colega Byron Lesire, un hoben autista, un realidad.
Byron Lesire ta un empleado di Smart Systems cu ta admira Nicole Hoevertsz masha hopi mes y semper el a expresa su admiracion pa e tremendo trabou cu Nicole ta eherce pa mundo di deporte na nivel nacional y internacional. Den forma di sorpresa su coleganan di Smart Systems a bin cu Nicole te na su trabou pa asina por haci un di e soñonan di Byron realidad.
Nicole a keda sorprendi pero mas cu tur cos, hopi encanta cu e entusiasmo y pasion cu Byron ta papia di Nicole, di e trabou cu Nicole ta desplega den mundo di deporte. Byron mes ta un bolichero y su soño ta pa un dia, e tambe por representa nos pais, mescos cu e otro bolicheronan di Aruba manera Kamilah, Tashaina y demas bolicheronan.
BYRON TA RICIBI REGALDO DI NICOLE
Por ultimo, Nicole Hoevertsz a sorprende Byron, un biaha mas, door di regal’e un pin special. E ta un pin otorga na atletanan cu lo representa Aruba den exterior. Pero como un gesto special cu Byron, Nicole a haci entrega di un pin special. Byron tabata e prome persona na Aruba cu a ricibi e pin aki, e pin di Tokio 2020.
