E ordo di minister Glenbert Croes na Departamento di Labor pa no otorga ningun permiso di retiro, ta resulta devastado pa algun compania. E pensamento cu tanten cu tin subsidio di salario, cu no por retira trahado, no ta sostenibel den corte. Siman pasa hues a permiti pa e compania di perfume y beyesa, JL Penha, pa retira tres trahado cu no kier a acepta un retiro boluntario. Corte ta di acuerdo cu e ponencia cu subsidio di salario no ta yega pa wanta trahado na pi’i trabou.
E hecho cu companianan ta pidi pa reduci trahado pa rason economico, ta valido. Esey hopi negoshi tabata teme antes, pasobra facilmente por bisa cu ta cobrando subsidio di salario toch. E compania por a demostra cu negoshi ta cayendo e ultimo añanan y e aña aki, debi na pandemia, cu a caida ta espantoso. Esey e hues a considera un motibo valido pa honra e peticion pa retiro di tres empleado, cu ta bay cas cu un pago di 11.500, 10.600 y 4000 florin respectivamente.
E compania estableci na Corsou pero cu ta maneha 9 filiaal na Aruba, a conoce su añanan di abundancia pero tambe esunnan menos bon. Asina e ultimo añanan 5 añanan, anualmente e bentanan di e compania a cay entre 10% cu 20% compara cu e aña prome. Aña pasa e caida a alcansa 44%. Pero den e prome 6 lunanan di e aña aki, e caida a yega 72% despues cu gobierno a obliga pa cera e tiendanan pa algun siman y despues turismo a keda abou. A haya nan ta cera algun sucursal, entre otro esun situa riba Plaza Daniel Leo. Ey tabatin 6 empleado di cual 3 a acepta un pakete di retiro y 3 a opta pa bay bringa nan caso den corte.
Cu e sentencia aki awo, lo por spera mas negoshi bati na porta di corte pa disolve e acuerdo di trabou cu nan trahadonan. Pasobra economia ya tabata pasando den reto caba e ultimo añanan y e ultimo desaroyonan rond di Coronavirus y e crisis economico cu a bin cu ne ta resulta devastado pa mayoria. E pensamento cu subsidio di salario ta e salbacion no ta corecto pasobra un negoshi tin hopi mas gasto cu djis salario so.
