A habri siman cu algun informacion valioso y interesante di parti Roderick Croes, director di Aduana, riba diferente punto di interes tanto pa comercio como e comunidad general. A bay ampliamente riba algun pregunta pero sigur tambe riba con ta mira 2023 pa e departamento/ dienst esencial aki pa nos isla.
Croes a expresa di ta mira Duana trahando di un manera moderno, cu ta mira Aduana e como un dienst importante pa Aruba, cu amplio capacidad pa sigui traha pa pone un paro riba tur cu ta haci malo. Na mes momento continua cu e bon trabou y cumpli cabalmente cu servicio cu ta brinda. Un Duana respeta pa tur hende.
Na mes momento tambe a gradici y duna elogio na tur trahando cu a haci e bon trabou tur e dianan aki. E duaneronan ta trahando, no ta algo cu ta bin dilanti hopi den comunidad aunke e biaha aki si a ricibi un cobertura den prensa y como tal ta na su luga pa gradici y empuha nan
pa sigui cu e bon trabou. Un palabra di elogio na nan. Pa locual ta trata e structura interno, tin di bisa cu Duana ta trahando cu un sistema hopi mas moderno. Cu un cita, ta regla fecha y Duana mes ta yega pa asina atende e cliente. Naturalmente tin di tene cuenta cu algun factor, vakantie y demas pero ta algo cu ta manehabel.
A probecha pa haci pregunta riba un critica cu ta surgi frecuentemente relaciona cu fecha festivo, caminda ta tuma un of mas fecha a costo di dia cu por atende pa servicio. Gran parti di e critica ta basa riba e fechanan di fin di aña, cu ta crucial pa comercio. Di otro banda tambe a remarca cu ta un critica cu poco ta scucha di cualkier otro dienst.
Di su banda Roderick Croes a enfatisa cu mester ta consciente cu Duana ta e ultimo post den e proceso, for di momento cu a encarga un of otro producto/mercancia te na e fase final, Duana ta e ultimo den e cadena aki y cu esey ta pone tambe cu Duana ta haya e sla ( critica).
Pa pone un ehempel, por menciona cu frecuentemente ta observa diferente barco ta core atrasa den nan ruta y yegada pero e barco no
ta ricibi critica ta Duana ta haya esaki. Na esaki ta bin e ora un esfuerso maximo di parti Duana pa implementa dia extra, diasabra si ta
necesario, pa asina surpasa e atraso cu a surgi debi na e barco cu a drenta laat.
Croes a conseha pa haci un miho planificacion
Fecha di algun ATV dag obligatorio anuncia di antemano pa gobierno, ta contribui hopi biaha cu locual cu ta pasa fin di aña. Pa un miho
resultado lo ta consehabel planifica adelanta como cu ta un anuncio cu ta Sali di un aña anterior. Algo cu por ta e compania por tene cuenta
cu ne y plania bon riba dje. Pa locual ta trata e factor di yobida, segun cita cu Duana, nan ta presenta pero ta bira e ora un opcion di parti e comerciante si ta baha of no e carga como cu awa ta yobe. Hopi biaha e duanero ta den regenjas para eynan cla pa traha pero e comerciante ta opta pa miho no haci esaki pa evita cu producto ta muha. Ta situacion cu ta tuma luga, cu ta pone un retraso pa e siguiente afspraak y asina ta cay atras.
Crecemento den turismo ta nifica crecemento economico
Duana na e momento aki tin un stop. En berdad cu crecemento ta bin cu ne e necesidad di mas personal, cu esey a haci e pregunta na e hefe di Duana si acaso tin pensamento riba e tema aki. Croes a indica cu a haci un peticion na e minister encarga cu e maneho, pa duna
autorisacion un grupo (na mas personal) pa Duana den careda di otro aña, aunke tin di remarca cu a haya un grupo di diescinco duanero nobo
cu a drenta dienst prome di januari. E grupo aki a train durante aña pasa pero for di comienso di e aña aki a drenta y cuminsa traha. No ta
descarta cu tin un necesidad si pa algun duanero mas pa sigui brinda e bon trabou.
