Autoridad Dominicano a informa cu e narcotraficante di nacionalidad Hulandes a logra huy di e prizon Bani despues cu a logra su detencion na 2021. A indica cu e tempo ey, e sospechoso lo a enfrenta autoridad y a cuminsa un bashamento di bala pero asina mes a captur’e, caminda a bin confisca un cargamento grandisimo di droga.
Un di e presonan cu a logra huy di e prizon Bani, ta vincula cu e 897 bulto di cocaina descubri y confisca na costa di Matanza, provincial di Peravia den luna di april 2021. E tempo ey tabata trata di aproximadamente 912.25 kilo di droga.
Autoridad a duna di conoce cu e tempo ey, e individuo, hunto cu algun hende mas, a logra sorprendenan na momento cu nan kier a introduci e paketenan aki den e pais. Ora a mira cu polis fuertemente arma a presenta riba nan, a cuminsa un bashamento di bala entre nan cu polis di e departamento Nacional di Control di Droga (DNCD).
E momento ey nan a logra scapa momentaneamente di husticia pero no a yega mucho leu di costa. Un par di dia despues a tene un entrada hudicial na un cas den cercania di lama caminda a bin logra haya un cantidad di 25 bulto di droga. Ademas a logra captura e narcotraficante cu nan a identifica como David Alberto Leung, cu ademas di carga nacionalidad Hulandes e tin nacionalidad Spaño tambe.
Durante e investigacion di 2021, a detene e individual Rubiano aki, cu a bin resulta di ta e fugitivo cu a caba di scapa di prizon actualmente. Durante entrada hudicial e dia di su detencion , a bin confisca ademas di e cantidad grandi di droga, a bin topa cu diferente documento personal, algun paspoort, cedula, carnet, seguro, un telefon satelital, sistema di GPS, ekipo di buceo, varios ijsjug, dos vehiculo (ATV), dos UTV y un brommer.
Su detencion a induci na varios otro detencion di hende di diferente nacionalidad, entre nan Dominicano, Venezolano y Rubiano cu tambe tabata vincula cu e traficacion di e botin grandi di droga aki.
Pa locual ta trata su huida. A compronde cu ta trata di dos of tres persona cu lo a logra di huy cu ne. Esaki a tuma luga riba diamars 4 di juli for di e prizon di Bani. Un persona a perde su bida durante e intento. Caya ta papia cu ta durante cu e tabata purba huy e lo a fayece y no a logra scapa. Segun autoridad, nan no ta mira relacion entre e criminalnan aki, nan no conoce otro.
Procurador general di e pais a indica cu lo elabora un informe completo relaciona cu e escape di e narcotraficante aki y asina detaya kico a tuma luga y esfuerso pa su captura di nobo.
