Algun dia caba polis ta buscando e persona aki y diamars mainta a logra su detencion. Ta trata di un conoci di husticia fam Tevreden. E tabatin un ordo di detencion riba su cabes y no a tarda mucho cu nan a topa cu ne.
Esaki a tuma luga den careda di 9:30 am, di diamars mainta, den Calbas/ Bacobastraat na Dakota. Patruya a presenta, a efectua e detencion y mesora a pidi transporte policial pa hiba e sospechoso direccion warda.
Locual a compronde, cu e persona aki nan tin un ordo di detencion p’e relaciona cu un caso di ladronicia di telefon. Ta sospecha cu e por tin di haber cu e atraco cu a tuma luga na Botica Dakota y cu a ranca bay cu un telefon. Ta corda cu e sospechoso aki a sali na careda na pia direccion Marlboro Ballpark. Aunke esaki no ta informacion confirma.
Di otro banda e persona aki ta envolvi den un acto serio di maltrato caminda cu e victima a resulta gravemente herida y mester a busca ayudo medico den exterior. Ta papia di fracturanan serio na cara di cual ainda e no a recupera totalmente.
E persona aki a regresa Aruba si despues di algun tempo den exterior y ta te ainda bou tratamento medico. Segun por a compronde cu ta trata di un persona conoci den bario cu ta hiba e nomber di Oye. Mientras cu e detencion tin di haber cu e acto di ladronicia di telefon, no ta descarta cu e lo hay’e confronta cu cargo relacion cu e maltrato severo aki tambe.
