Dialuna mainta trempan, un grupo di empleado malcontento di De Palm Tours, a entrega un carta na gerencia di e empresa,expresando diferente preocupacion riba e condicionnan laboral y siguridad di trabao. N’e entrega di e carta Ryan Giel, representante di Federacion di Trahadonan di Aruba (FTA), a compaña e trahadonan.
Giel a splica cu FTA a negosha e ultimo CAO cu cual nan a considera faborabel. Sinembargo a surgi algun regla nobo despues di e acuerdo, cu a crea un ambiente laboral tenso. “Despues di e negociacion di e CAO, a implementa cierto normanan cu awo e empleadonan ta sinti manera cu nan ta cana riba “eggshells.” Esaki ta crea un incertidumbre constante: “Si mi bin traha awe, kisas pa ora mi caba mi lo perde mi trabao,” Giel a bisa.
E representante di FTA a destaca cu e entrega di e carta no ta un paro di trabao. “A entrega e carta den un bon ambiente. No ta trata di un paro di trabao, sino di un protesta. De Pal Trous ta sigui opera normalmente. Esaki ta demostra cu nos por atende e problemanan aki sin para trabao. E carta a wordo bon ricibi y den un tono positivo,” el la afirma.
Siguiente pasonan y expectativa
Gerencia di De Palm Tours a ricibi e carta y ta evaluando e proximo pasonan. Giel a sigura cu FTA semper a mantene un bon comunicacion cu gerencia y ta confia cu nan lo sinta na mesa pa dialoga riba e puntonan treci padilanti. “Gerencia a tuma e carta den bon ambiente y nos ta spera di por sinta discuti e puntonan treci dilanti. Diamars nos lo tin un reunion cu e grupo di busdrivers pa profundisa riba e temanan y sigura cu tur cos ta corecto,” Giel a indica.
Preocupacion di e trahadonan
E grupo di trahado malcontento, inclui principalmente e chauffeurnan di bus, a inclui cerca di 40 pa 50 empleado. Un di e principal preocupacionnan expresa den e carta t;e miedo di perde nan trabao, specialmente despues di e retiro di un colega cu mas di 28 aña di servicio. “Esaki ta un di e puntonan di e carta. Varios retiro a tuma luga. E empresa tin su reglanan, cu nos ta respeta, pero e movementonan aki ta genera un ambiente laboral tenso. Traha cu miedo no ta saludabel. E luga di trabao mester ta trankil y sigur. Actualmente e no t’asina,” Giel a splica.
Sin fecha limite pero cu urgencia
E carta no ta establece un fecha limite pa atende e preocupacionnan, pero Giel ta confia cu gerencia lo actua rapidamente. “No a establece un fecha limite. E carta ta proporciona informacion y nos ta confia cu gerencia lo atende e asuntonan e siman aki,” el a conclui.
