Recientemente un turista a publica online con ‘awesome’ of master e Rubianonan ta, den un di e gruponan mas grandi online unda turistanan ta frecuenta pa biaha of siña di Aruba ‘All Things Aruba.’ E tipo di remarkenan aki bo ta scucha hopi biniendo for di nos bishitantenan riba con amabel, servicial, y awor hasta con master nos Rubianonan ta. Esaki ta bini hopi biaha danki n’e tipo di hendenan manera Curtis Pieternella, 52 aña di edad, di San Nicolas.
Curtis ta un Tourguide Operator cu ta traha pafo na Waf y tin 17 aña trahando den Tours, cu un total di 30 aña den turismo trahando den diferente hotel. E ta un persona cu ta gusta entretene su turistanan den joke sano, pone nan hari bay gol, baila of canta, anto hasta a yega di sali ariba e conocido plataforma TripAdvisor. Sin embargo Curtis tin un historia interesante, specialmente den loke ta baile y show.
Algun dia pasa el a duna un grupo di turista tour rond Aruba y nan tabata papia riba algun artista y cantante. “Mi a bisanan cu tempo di mi tempo na aña 80 y 90 mi tabata Breakdance, Hip Hop, Planet Rock y tambe estilo Michael Jackson, pero no kier a kere mi,” Curtis ta bisa.
Ta asina cu den añanan 90, el a haci show den RCTV na Caracas, Venezuela riba television. El a baila den un certamen di beyesa riba e cancion di Janet Jackson – Escapade, y tambe a yega di presenta cuater biaha den Sabado Sensacional, dos na Venezuela y dos na Aruba den 1992. El a baila tambe den show di Ricardo Montaner ‘Vamos Negro Pa la Conga’, anto e artista mes a pidi e fabor cual pa Curtis tabata un gran placer. “Algo spectacular cu mi nunca lo lubida. E tempo ey mi tabata hopi jong, aunke ainda cu mi 52 mi kier mustra nan cu mi tin algo aden ainda y duna nan un Usher style dance.”
Asina Curtis a buta show p’e turistanan, nan a bira loco y keda babuca gosando masha hopi mes di e show cu el a buta pa nan ‘on the spot’ mane nan ta bisa. Nan a grab’e anto riba e pagina di Facebook di Curtis mes el a bay viral cu miles di views caba. “No ta tur ora mi ta haci esey, pero mi a haci un excepcion. Mi ta gusta tene mi turistanan contento, pa nan bolbe bek nos dushi Isla Aruba pronto cu mas invitado,” Curtis ta bisa.
