Dialuna atardi laat a tuma luga un reunion entre director di Post Aruba, Guillermo Raymond, secretario general di sindicato SEPPA, Magaly Brito y Minister Geoffrey Wever. Tur cos ta draai rond di e problematica di aumento di salario, indexering y trato husto p’e trahadonan.
Na final di e reunion a entrevista director di Post Aruba, Guillermo Raymond kende a conta un poco di su perspectiva con e reunion a bay. Segun Raymond, a papia riba e situacion di Post Aruba y aumento di 105 florin. E partidonan ta den Corte pa mas cu un aña caba pa cu e aumento automatico di 105 florin. Te ainda e partidonan no a yega na otro, ta wardando e caso den Corte p’asina mira con por sigui cu e trahadonan. E partidonan lo ta bek na mesa aki seis siman.
A acerca Minister Geoffrey Wever cu peticion pa un entrevista, sinembargo a compronde cu e tabatin otro compromiso despues di e reunion.
Di otro banda a combersa tambe cu secretario general di SEPPA, Magaly Brito. Segun Brito, e peticion di e trahadonan ta cu durante e periodo di entrega di 12.6%, nan a entrega pero awo cu tin indexering p’e trahadonan publico, Post Aruba ta keda afo. Post Aruba a para e aumento automatico di 105 florin cu e trahadonan tabatin den pasado. E trahadonan ta bayendo atras mirando e costo halto di bida riba nos isla. A papia cu Minister pa gobierno hinca mas placa den Post Aruba p’asina sigura un ahustacion husto p’e trahadonan.
Na final e 105 florin no ta yega den comparacion cu e perdida di compra. Minister ta di opinion cu no por sigui di e forma con ta bayendo actualmente. Na pia di trabou no tin motivacion. Tin indicacion cu gobierno kier sigui laga Post Aruba bay atras pa despues tuma e conclusion cu no tin motibo pa tene na bida mas. Tin un plan di reorganisacion pero e contenido no ta conoci ainda. Di otro banda ta importante p’e trahadonan sa kico ta nifica cu gobierno debe Post Aruba y Post Aruba debe gobierno. E caso ta andando na Corte y na final si e sali positivo, e trahadonan por ta sigur cu nan lo ricibi locual a bin busca dialuna atardi.
