Dos dia pasa nos reporteronan a haci un cobertura na e veld di Little League cu tin patras di Cruz Cora y Don Elias Mansur Ballpark. E motibo ta e sushedad cu ta tira eybanda. E veld aki henter siman ta den uzo pa boluntarionan cu ta train mucha cu kier practica baseball. Mas cu un ocasion hendenan iresponsabel ta benta sushi anochi laat ora cu no tin hende eybanda.
Hopi biaha esunnan cu ta uza e veld mes ta haci e limpiesa atrobe pa asina muchanan por sigui train. E biaha aki si un di e entrenadonan a cansa y a avisa nos redaccion y reportero di 24ora a bay pa un cobertura. Mesora cu e informacion a subi riba website, Bureau City Inspector a activa. Nan a zorg pa manda ploeg bay haci limpiesa. E veld a keda limpi limpi. Ta spera cu e biaha aki hendenan compronde cu eynan no ta un Dump.
Bo ta perhudica deporte cu e tipo di comportacion. Bureau City Inspector ta cay directamente bou di Minister Ursell Arends. E mandatario ta sostene totalmente e trabou cu e departamento ta haciendo ultimo tempo. Nan ta sigui volg areanan cu hende iresponsabel ta tira sushi y activa e departamentonan cu tambe ta coopera pa e accion di limpiesa tuma luga mesora.
