Siman pasa a sosode un caso caminda grupo di hoben a bay den e area turistico pa asina horta bicicleta di turista. Polisnan di Strand Politie a mira e situacion y a actua mesora. A cuminsa un persecusion caminda hasta mas unidad di Polis mester a duna un man.
E hobennan sospechoso cu a caba di horta un mountain bike di turista a core den tur direccion. Uno hasta a core bay riba bicicleta direccion lama. Eynan a benta bicicleta for di baranca y bula den lama. El a kere cu asina e por scapa di Polis. Net e tabata esun cu a ser deteni mesun momento di buskeda. A logra coy e bicicleta tambe for di lama.
Djey e buskeda a sigui pero e otronan a scapa. Nan a logra scapa y sconde pero no pa largo. E investigacion a continua y a base di investigacion a yega na adres Uruguaystraat 4.
Dos recherche di Strand Politie encarga cu e area di hotel a presenta na apartamento number cinco di e adres menciona. Polisnan di Playa a duna un man tambe pa asina evita cu e dos sospechosonan naci na Republica Dominicana por scapa. Na e adres a mustranan riba nan derecho y detene ambos persona.
Nan mester splica riba nan rol den e ladronicia unda a gara un di e amigonan “Op Heterdaad”. Aruba ta basta mal para cu e bishita di turista cu ta nos pilar economico principal. Awor cu e actuacionnan asina e ta haci e situacion mas dificil pa nos isla. Sin mas bay horta bais di turista ta inaceptable. Cualkier ladronicia ta di condena. Spera husticia atende e caso cu man fuerte.
Ta aprecia tambe cu Strand Politie no a laga e caso un banda y a keda insisti pa asina gara otronan envolvi. Asina ta haya sa precies kendenan ta moviendo causando daño den sector turistico. Awor mester purba haya sa si nan ta mas activo den area cu otro casonan anterior.
