Diamars atardi laat a pidi presencia di polis na ex The Mill Hotel. A drenta informacion cu tin un homber riba propiedad di Courtyard Marriott cu no ta bonbini. Mirando cosnan di pasado a pone cu e no mag ta riba propiedad di e hotel mas. A yama polis cu a yega. Polis a kere cu nan por bay convence e homber na un manera nechi pa bandona e sitio.
Polis a faya cu nan pensamento. E homber a dicidi di no sigui ordo di polis. El a bay mas leu ainda di resisti e detencion. Polis na un manera tactico y cu mannan fuerte a logra detene e homber y presente dilanti un subfiscal cu a dicidi di papia cu ne fuerte riba su comportacion. No ta conoci dicon e homber ta gusta bay unda e no ta bonbini. Su insistencia di ta unda e no ta bonbini a causa cu el a perde su libertad diamars atardi net prome cu solo a baha.
