Pa di diestres aña consecutivo ta organisa e evento “Ban topa cu nos cahanan di orgel”. E evento aki a tuma luga diadomingo 2 di juni 2024 na Papiamento Restaurant.
A combersa cu e organisado di e evento cultural Reginald Felicia cu a splica cu “Ban topa cu nos cahanan di orgel” ta un evento cu e meta pa mantene e musica di caha di orgel cu ta data for di siglo 19, cu despues di tempo a bin ta forma parti di cultura di Aruba.
Felicia ta mustra cu e evento a cuminsa diestres aña pasa cu participacion di varios cahanan di orgel for di Aruba como tambe for di Corsou. E organisado ta mustra na momento cu a ripara cu cultura di caha di orgel ta debilitando, a tuma un iniciativa pa bolbe duna estimulo pa lanta interes cerca e publico pa e “musica di caha di orgel” y na mes momento mantene e doñonan di e instrumentonan musical na nos isla uni.
E conocedo di e musica di caha di orgel ta mustra “nos ta sigui cu e cultura aki, pasobra caha di orgel nunca no ta bo muri, si bo ta yam’e ‘chapo’…esaki ta e cos di mas original cu tin pa bo scucha.” Ta enfatisa cu caha di orgel ta forma parti di cultura y no por lag’e cay.
Na final di e organisado ta masha contento cu evento, y ta spera pa otro aña di por conta cu asistencia di e fiel bishitantenan cu ta disfruta di e musica di caha di orgel.
