Na diferente ocasion prome minister a informa di ta den combersacion cu Hulanda y no kier habri e dialogo pa paga e debe. E mandatario no ta kere cu tin un argumento specifico riba e punto aki.
mr. Evelyn Wever-Croes, prome minister, a indica riba e acuerdo cu nan a yega na dje pa loke ta trata loke mester paga bek na april 2022, pero a schuif pa aki diesocho luna, esta otro aña na october. P’esey prome cu october 2023, gobierno mester tin un plan con pa bay paga bek. Aruba den Reino Caribense ta esun cu tin mas insistencia pa papia riba e tema aki. Segun e mandatario, e ta kere cu Hulanda lo habri e discusion na momento cu Corsou y Sint Maarten tambe ta asina leu.
Aruba ta den un boto cu mas pais y ta depende tambe riba e desaroyo di otro pais. Minister di Finansa a anuncia cu ta trahando riba un memorandum financiero economico nobo cu ta bay stipula e trayecto cu ta bay cana pa sali fo’i e efectonan di crisis. Den esey gobierno mester bay kibra nan cabes con ta bay yega na e pagamento bek dje debe aki.
Gobierno su punto di salida ta cu e ta un prestamo, pero na comienso caba a trece riba mesa e parti di kwijtschelding, un parti di schenking cu lo yuda enormemente pa Aruba sali fo’i e situacion di debe. E tempo ey Hulanda a indica pa mira con hopi Aruba ta progresando riba aspecto di e reformanan y e ora ey por papia dje tema aki.
E tema ey ta keda riba mesa pa gobierno. Pasobra si Hulanda tabata bon pa duna kwijtschelding of un schenking na otro pais den Europa, Wever-Croes ta kere cu Aruba tambe tin derecho di haya esaki. Den cuadro di esaki ta bay tin reunion un biaha mas di Nacionnan Uni. E asamblea general di Nacionnan Uni ta bini hunto e luna aki y esey ta un punto di agenda cu Aruba ta trece dilanti. Nacionnan Uni tambe ta boga p’e paisnan manera Aruba, Small Island Development States, por haya converti parti di nan debe door di Covid den grands, manera subsidio. E mandatario a indica cu eynan tambe nan lo haci uzo di tur e avenidanan cu tin pa asina por yega na un solucion riba esaki.
Pa loke ta e memorandum di financiero dialuna Minister di Finansa a firma esaki y p’e ta cla dentro di seis siman. Segun prome minister, den curso pa fin di october gobierno mester tin un idea. Pero semper nan ta tuma un par di siman mas pa ampli’e y laga mas hende mir’e. E ta kere cu den november nan lo anuncia kico e ta. E mandatario a expresa mescos cu e prome FEM, manera Minister di Finansa firm’e, e lo ta publica. Esey lo bira e caminda cu Aruba lo cana. Mas cu claro mester bay parlamento y envolve otro stakeholder riba e tereno, y asina e lo ta publica.
