Diaranson atardi, caso Ibis a continua unda cu a toca turno na mr. Demis Illes, abogado defensor di tanto Melony como Paul Croes pa trece su pleidooi dilanti. Pero nan a entrega un rapport financiero riba situacion financiero y di labamento di placa di cual ta acusa pareha Croes. Esaki no a cay den mucho bon tera cerca e tres huesnan di Corte di Apelacion. Pero mirando e importancia y relevancia di e rapport financiero aki, mr. Illes a insisti.
mr. Illes a cuminsa na bisa cu e caso contra di ex-mandatario, desde comienso te final, e investigacion contra Paul Croes como minister, tabata tin iregularidadnan cometi. A tap combersacion, a haci investigacion, tene razzia n’e cas cual a spanta e yiunan di e pareha, pa cual te dia di awe e muchanan ta trauma pa esaki.
Segun e abogado, ta acusa su clientenan di labamento di placa. E ta haya cu a base di accountant, tin fayo den e investigacion financiero cu tin consecuencia den e caso di Paul y Melony. Abogado mr. Illes a trece un experto dilanti pa splica hof un que otro tocante foutnan cometi durante investigacion y calculacion di e sumanan.
A hiba defensa riba cada un di e puntonan, pero tambe na final a trece dilanti e hecho cu Ministerio Publico a viola varios tratado internacional. Casi por bisa cu no por papia mas di un huicio husto. mr. Illes a trece padilanti con e trata pa cu Paul tabata ta, unda cu a cer’e hunto cu e personanan cu problema psicologico. Esaki ta traha mentalmente riba cualkier persona. A pidi hof pa tene tur esakinan den consideracion na ora di delibera riba un sentencia.
Pa un relato mas amplio, lesa TREMPAN di mañan.
