Partido MPB (Movementu di Pueblo Boneriano) a tuma nota di un publicacion den medionan di comunicacion y hunto cu ne tabata tin un potret cu a keda saca na momento di conteo di voto, caminda hopi otro politico di tur partido tabata presente.
Nos por bisa cu MPB a keda yama pa personanan riba lista di diferente partido esta PDB, UPB y M21 cu kier combersa cu nos di MPB. Pero ainda mester bay sinta na mesa pa combersa y negosha. Den eleccion di dia 15 di maart 2023, a keda demostra cu partido PDB (Partido Demokrat di Bonaire) ta e partido ganado cu 3 asiento, sigui pa partido UPB (Union Patriótiko Boneriano) cu tambe tin 3 asiento. Pues ta bisto cu ta e dos partidonan aki, ta esunnan prome yama pa forma coalicion.
Nos partido no kier defrauda e 2034 votado cu a deposita nan confiansa den nos partido, tampoco e 855 personanan cu ta sostene nos lider. Esaki ta un dje motibonan cu e portanan di MPB ta keda habri pa ricibi tur hende, tambe nos ta dispuesto na hiba combersacion cu tur partido cu ta reconoce e trabou di nos partido y nos lider den e ultimo cuater añanan y kier forma un coalicion cu Partido MPB. Nos di MPB a forma un comision di orientacion cu ta dispuesto na sinta na mesa cu tur partido pa scucha kico nan tur tin di ofrece.
E comision ta consisti di:
Renata Domacassé, Din Domacasse, Junny Wout y Mazarella Jansen. Partido MPB ta kere cu hunto mester delibera pa yega na un coalicion nobo pa sigui goberna Bonaire den e proximo cuater aña. Nos di MPB ta convenci cu tin hopi trabou ainda pa finalisa, y cu otro trabou mas di prioridad cu mester entama.
Cualke partido interesa por tuma contacto libremente cu Renata Domacassé kende ta e persona di contacto di partido MPB.
