Cu yegada di e temporada cu e studiantenan ta cuminsa bay afo pa sigui nan estudio, psicologo Mitsy Willems kier a trece dilanti e topico di ‘Empty Nest Syndrome’ pa asina conscientisa e mayornan con pa lidia cu esaki.
‘Empty Nest Syndrome’ ta algo cu hopi mayor ta experencia, ora cu nan yiu(nan) ta bay fo’i cas, desplasa for di cas di e mayor y esaki ta causa un miedo di soledad den e mayornan.
P’esey ta importante pa e mayornan prepara nan mes mentalmente cu esaki ta bay pasa, esaki por trece menos consecuencia despues. Willems ta recomenda pa busca un profesional pa yuda den e temporada aki y pa informa bo mes cu e momento ta yegando. Loke ta importante ta e comunicacion entre mayor y yiu como tambe pa e mayor percura pa haci otro tipo di actividad y concentra riba e pareha pa asina enfoca riba otro cos cu no ta e sentimento di soledad aki.
Pa loke ta trata e studiantenan cu ta tuma e decision pa bay studia afo y laga loke nan conoce atras, ta importante pa prepara mentalmente pa esaki tambe. Hopi studiante ta experiencia un sensacion di nostalgia, tin di nan no ta logra caba nan estudio pa diferente motibo manera nan no a gusta e cultura, nan ta wordo discrimina of nan no por handle e distancia y ta leu for di loke nan ta custuma cu ne.
Asina e psicologo ta conseha pa busca un profesional, sea un psicologo of un consehero of atende workshops pa asina fortalese e preparacion aki. E ta enfatisa cu e comunicacion ta keda importante, pues ta bon pa informa mayor of algun familiar of conoci di loke ta pasando, awendia esaki ta mucho mas facilita cu tecnologia avansa caminda bo por interactua cu e persona.
