Ministerio Publico di Corsou a manda informa cu awe, 26 di juni, Landsrecherche Kòrsou (LrC) a detene tres persona, di cual un di nan ta Parlamentario Rennox Calmes. Banda di esaki, a realisa entrada hudicial bou guia di hues comisario na diferente vivienda y den oficina di e Parlamentario den edificio di Parlamento na Punda. A confisca e articulonan relevante p’e investigacion.
E entrada hudicial a tuma luga relaciona c’un investigacion penal di falsificacion di documento. Ainda e investigacion ta andando y no ta exclui mas detencion y entrada hudicial.
Corupcion oficial ta desestabilisa e confiansa den y e autoridad di Gobierno. Finalmente pa e motibo aki, un pais por keda desestabilisa si no responde di un manera adecua. Ministerio Publico y Landsrecherche Kòrsou tin atencion completo p’e forma di criminalidad desestabilisante aki.
Tocante Landsrecherche
Landsrecherche ta un organo investigativo independiente cu un tarea special. E ta orienta su mes riba persecucion di e delitonan cometi door di e funcionarionan (semi) gubernamental bou di guia di Ministerio Publico. Landsrecherche ta actua principalmente den e ambito di conducta castigabel cu gravemente ta afecta e integridad di e administracion di husticia y integridad di e administracion publico.
