Corte di Prome Instancia diabierna a dicta sentencia den e caso Avestruz, cu tabata tin un total di 11 acusado.
Abogado mr. Vito Carlo a representa tres di e acusadonan, Curt Harms, Frederick Every como tambe Carlo Mansur. Di total di tres (3) acusado, un so a haya vrijspraak, den caso ki ta trata Frederick Every.
mr. Carlo a expresa cu e no ta ful contento cu e sentencia, aunke cu un di nan a haya ful vrijspraak y dos di nan no a haya loke fiscal a pidi. Segun e abogado, el a ripara cu hues a tene cuenta cu hopi di loke defensa a trece dilanti pero ainda tabata falta hopi mas.
E abogado a sigui bisa cu, un biaha mas, na su opinion Ministerio Publico a haci hopi fout y ainda tin hopi trabou pa haci pa asina tur su clientenan haya vrijspraak.
mr. Demis Illes, representante legal di Peter Susebeek, cu den e caso aki a haya un sentencia di dos (2) aña di prizon, di cual uno (1) ta condicional, pa actieve omkoping. El a indica cu e lucha ta sigui, di un banda nan ta contento cu e sentencia, ya cu hopi cos cu a bin dilanti den e caso grandi aki, unda cu e asina yama acusacion principal a keda kibra na filingrana. Pero na ultimo a bin ‘trompeca’ riba tres donacion duna hopi aña atras y awo ta vincul’e na un derecho riba erfpacht.
Defensa ta haya cu e ultimo aki, no tin conexion cu otro pa cual nan ta sigui y tin confiansa cu nan lo haya rason den Corte di Apelacion.
